Pavlodarda eki aýylda mektepter ashyldy
PAVLODAR. KAZINFORM - Onyń biri bıyl qysta órtenip ketken mektep ornyna, ekinshisi apattyq dep tanylǵan eski bilim uıasynyń ornyna salyndy.
Jańa oqý jylynda Ertis-Baıan óńiriniń aýyldyq jerlerinde jańadan turǵyzylǵan úsh aýyldyq mekteptiń tusaýyn kesý josparlanǵan edi. Onyń ekeýi QR Konstıtýtsııasy kúni qarsańynda ashylyp otyr.
Aqqýly aýdanynyń Tilektes aýylyndaǵy aıadaı ǵana eski mekteptiń ǵımaraty apattyq jaǵdaıda dep tanylyp, oblys ákimi Asaıyn Baıhanov jergilikti jurtpen kezdesýde jańa bilim oshaǵyn salyp beremiz dep ýáde etken. Aıtqandaı, jańa mektep nebári 5 aı merzimde turǵyzyldy.
- Memleket basshysy Qasym-Jomart Toqaev: «Álemde balalardyń baqyty men kúlkisinen mańyzdy eshteńe joq. Óskeleń urpaqtyń jan-jaqty damýy úshin qolaıly jaǵdaılar jasaý – árqashan bizdiń memleketimizdiń basty mindetteriniń biri», degen edi. Aýyl balalarynyń áleýetin ósirý, olardyń zamanǵa saı mektepterde bilim alýyna qol jetkizý biz úshin irgeli maqsattardyń biri bolyp qala beredi. Tilektes aýyly adamdarynyń ótinishi az ýaqyt ishinde oryndalǵanyna qýanyshtymyn. Keleshekte mektepten bilimimen álemdi moıyndatar azamattar túlep usha bersin, - dedi óńir basshysy Asaıyn Baıhanov mekteptiń ashylý saltanatynda.
Mundaı záýlim ári zamanǵa saı bilim uıasy aýyl oqýshylary úshin kóp jyldan beri arman edi. Hımııa, fızıka, ınformatıka kabınetteri ozyq qural-jabdyqtarmen qamtylǵan. Mektep 90 oqýshyǵa laıyqtalyp salynǵanymen, jańa oqý jylynda ázirshe 52 bala bilim alatyn bolady.
- Mektep janynan 20 balaǵa arnalǵan shaǵyn ortalyq ta ashylyp otyr, onda 10 bala tárbıelenedi. Bul jerde júz jyl buryn alǵashqy bastaýysh mekteptep qurylǵan. Endi sol jańaryp, qýanyshymyzdy eselep otyr. Investor kompanııa barlyq oqýshymyzǵa mektepke arnalǵan jáne sporttyq kıimderin syıǵa tartty, - dep atap ótti Tilektes orta mektebiniń dırektory Aınur Bekbaýova.
Al aýdandyq bilim berý bóliminiń ádistemelik kabınet meńgerýshisi Gúlshat Battalova oqý orny óz tarıhynda alǵash ret jańa sporttyq zalǵa ıe bolyp otyrǵanyn jetkizdi. Buǵan deıin balalar jazda dalada, qysta tar kabınetterde dene shynyqtyrý sabaqtaryn oqyp kelgen.
- Memleket basshysy mektep baǵdarlamasyna jasandy ıntellektini engizý týraly tapsyrma berdi. Endi Tilektes mektebi aýdanymyz boıynsha JI engizilgen alǵashqy pılottyq bilim uıasy bolady. Sebebi munda aqparattyq quraldar, sonyń ishinde ZD prınter qoıylǵan, - dedi ol.
Aýyl turǵyny Rýslan Mýsın mundaı keń ári jaryq mektep aýyl balalarynyń bilimge degen qulshynysyn arttyratynyn, aldaǵy ýaqytta jas otbasylardyń turaqtap qalýyna múmkindik beretinin aıtty.
Bilim kúni qarsańynda Ertis aýdanynyń Bulanbaı aýylynda da jańa mektep paıdalanýǵa berildi. Bıylǵy qańtar aıynda mundaǵy eski mektep ǵımaratynda órt shyǵyp, tolyǵymen janyp ketken edi. Jańadan salynǵan mekteptiń jalpy aýdany - 241,1 sharshy metr. Alty oqý kabıneti, mektep jasyna deıingi balalarǵa arnalǵan mektepaldy daıarlyq, kompıýterlik synyp, sport jáne májilis zaly, ashana ornalasqan. Bıyl munda 20 bala bilim alady. Bilim berý úderisin 11 pedagog qamtamasyz etedi.
Merdiger uıym qurylys jumystaryn 2025 jyldyń 1 shildesinde bastap, 26 tamyzda aıaqtaǵan. Eki aıdyń ishinde ǵımarat salynyp, jańa oqý jylynyń bastalýyna tolyqtaı daıyn boldy.
Aýyl turǵyndary jańa mektep úshin júrek jardy alǵystaryn bildirdi.
- Mektep órtenip ketkende, bárimiz aýyldyń bolashaǵyna alańdadyq. Óıtkeni, aýyldyń bolashaǵy tikeleı mekteppen baılanysty. Biz úshin mektep - aýyldyń júregi. Balalarymyz kórshi aýyldarǵa ketýge májbúr bola ma dep qoryqtyq. Ákim jańa mektep salýǵa ýáde berip, sózinde turdy. Búgin balalar jańa synyptarǵa kirip, kóńilimiz jaılandy, - deıdi kópbalaly ana Bekzat Qymbat.
Aldaǵy oqý jylynda Pavlodar mektepterinde 116 myńnan asa oqýshy bilim alady.
