Pavlodarda egis jınaý naýqanyna 21 myń tonna arzandatylǵan janar-jaǵarmaı bólindi
PAVLODAR. QazAqparat - Pavlodar oblysynyń sharýalaryna egin jınaý jumystary úshin 21 myń tonna janar-jaǵarmaı arzandatylyp berilýde.
Bul týraly oblystyq aýyl sharýashylyǵy basqarmasy ósimdik jáne mehanızatsııa bóliminiń bas mamany Jazıra Súleımenova málim etti, dep habarlaıdy pavlodarnews.kz
«Kásipkerlerge shilde aıynda 7 myń, tamyz aıynda 8 myń, al qyrkúıek aıynda 6 myń tonna arzandatylǵan janar-jaǵarmaı berilýi tıis bolǵan», - deıdi Jazıra Súleımenova. - Alǵashqy eki aıdyń jospary tolyǵymen oryndaldy. Qazir qyrkúıek aıyna bólingen dızel otyny sharýashylyqtarǵa berilýde. Oblys boıynsha jeńildetilgen janar jaǵarmaıdy eń kóp suraǵan Ertis aýdany. Munda egin jınaý jumystaryna 4 myń tonna jiberildi. Sonymen qatar, Kachır, Sharbaqty jáne Ýspen aýdandary árqaısysy eki-úsh myń tonnadan aldy. Basqarma mamanynyń sózinshe, oblystaǵy aýyl sharýashylyǵy qurylymdaryna maldyń qysqy jem azyǵyn daıyndaý úshin 2,5 myń tonna janarmaı baǵyttalǵan.
Eske sala keterligi, bıyl oblysqa kóktemgi egis naýqany úshin 16 myń tonna dızel otyny bólingen bolatyn. Onyń 4 myń tonnasy naýryz, 6 myń tonnasy sáýir, 6 myń tonnasy mamyr aıynda beriledi. Sharýalarǵa arzandatylǵan janar-jaǵarmaıdy «PromServıs PV» JShS satyp jatyr. Operatorlyq qyzmetterdi esepke alǵanda 1 tonnasy 133274 teńge nemese bir lıtri 112 teńgeni quraıdy. Naryqta 135 teńgeden bosatylýda.
