Pavlodarda Dúnıejúzi qazaqtary qaýymdastyǵynyń jıyny ótti
Otyrysqa Aqtóbe, Qostanaı, Almaty, Aqmola óńirlerindegi fılıaldardyń basshylary men Reseıdiń Altaı ólkesindegi otandastarymyz qatysty.
«Byltyrǵy jyly mamyr aıynda ótken Dúnıejúzi qazaqtarynyń besinshi quryltaıynda Elbasy Nursultan Nazarbaev birneshe mindetter qoıǵan. Birinshiden, ortalyq keńseni Almatydan Astanaǵa kóshirý týraly tapsyrma bergen bolatyn. Bul tapsyrma oryndaldy. Ekinshi mindet - barlyq oblystarda qaýymdastyq fılıaldaryn ashý. Úshinshisi - qazaqtar kóp shoǵyrlanǵan shet eldermen tyǵyz baılanys ornatý. Onyń ishinde Qytaı, Ózbekstan, Túrkııa, Mońǵolııa elderi bar», - deıdi Zaýytbek Turysbekov.
Qaýymdastyq tóraǵasy orynbasarynyń aıtýynsha, búgingi jıyn «Uly dala» festıvaline oraılastyrylǵan.
«Ertis óńirinde uıymdastyrylyp otyrǵan «Uly dala» festıvaline byltyr da qatysqan edim. Sharanyń aýqymdylyǵyna tań qalyp otyrmyn. Buǵan qosa, bıyl festıvaldiń deńgeıi de ósken. Sondyqtan basqa óńirlerdegi ókildikterge kórsetý úshin arnaıy osynda shaqyryp otyrmyz. Elimiz egemendik alǵan 27 jyldyń ishinde mıllıondaǵan adam Ata qonysyna oraldy. Áli de týǵan eline qonys aýdarǵysy keletin qanshama adamdar bar. Elbasy olardy jaı ǵana kóshirip qoımaı, Izraıl, Germanııa, Reseı elderi sııaqty jaǵdaı jasaýdy tapsyrdy. Sondyqtan baspana jáne jumyspen qamtý - birinshi kezekke qoıylatyn másele», - deıdi Zaýytbek Turysbekov.
Kezdesý barysynda búginde sheteldik qazaqtarmen ǵana emes, barlyq qazaqstandyqtarmen jumys isteýge baǵyttalǵan «Otandastar» qorynyń mańyzdylyǵy týraly da sóz qozǵaldy.
«Bul qordyń quryltaıshylary - QR Syrtqy ister mınıstrligi men Sport jáne mádenıet mınıstrligi. Ony qurýǵa bir jyldaı ýaqyt ketti. 1 qyrkúıekte jumysqa kirisý josparlanyp otyr. Basty maqsat - sheteldegi belsendi qazaqstandyqtardy anyqtaý, olarmen baılanys ornatý, kómek kórsetý», - deıdi Zaýytbek Turysbekov.
Altaı ólkesi Qulyndy aýdany Kereı aýylyndaǵy Qarakól qazaq mektebiniń dırektory Nurǵaısha Barınova Dúnıejúzi qazaqtary qaýymdastyǵyna ekinshi ret qatysyp otyr.
«51 jyl ustaz bolyp eńbek ettim. Pavlodar pedagogıkalyq ýchılışesin bitirgenmin. Reseıde ana tilimiz ben ádet-ǵurpymyzdy umytpaý, jastardyń ultyn joǵaltpaýy úshin jergilikti «Bolashaq» ulttyq mádenı uıymyn ashtyq. Túrli sharalarǵa qatysamyz. Kereı aýylynda qazirgi tańda 85 shaqty taza qazaq otbasy qaldy. Biz ol jaqta ulǵaımaımyz. Kerisinshe, biz óz urpaǵymyzdy Otanymyzǵa qaıtaryp, elin tapsa eken dep tárbıeleımiz. Búgingi Ata jurtymyzda ótkizilip otyrǵan jıynnyń mańyzy óte zor, - deıdi tájirıbeli pedagog.
