Pavlodarda Dýbaıdan ushyp kelgen azamattar karantınge jatqyzyldy
PAVLODAR. QazAqparat – Pavlodar oblysynyń turǵyndary Dýbaıdan Nur-Sultanǵa QHR azamattarymen bir ushaqta ushyp kelgen, dep habarlaıdy QazAqparat tilshisi.
«Qazirgi ýaqytta Pavvlodar aımaǵynyń bes turǵynyn oqshaýlaý boıynsha epıdemıolog mamandar medıtsınalyq qyzmet kórsetýde. Bes adamnyń úsheýi-Aqsý, ekeýi Pavlodar qalasynyń turǵyndary, - dedi Pavlodar oblysy boıynsha Taýarlar men kórsetiletin qyzmetterdiń sapasyn baqylaý departamentiniń basshysy Sádýaqas Baıǵabulov óńirlik kommýnıkatsııa qyzmetinde ótken brıfıngide.
«Olardyń eń úlkeni 54 jasta, eń kishisi – 21 jasta. Arasynda balalar joq».
S.Baıǵabulovtyń aıtýynsha, qazir jedel medıtsınalyq kómek qyzmetkerleri olardy statsıonarlyq baqylaýǵa alǵan.
«Atalǵan Pavlodar óńiriniń turǵyndarynyń jaǵdaıy turaqty. Dene qyzýy, sýyq tııý belgileri baıqalmaǵan, biraq bul azamattar koronavırýstyq ınfektsııanyń taralý deńgeıi qolaısyz elderden kelgendikten Qazaqstan Respýblıkasynyń Bas sanıtar dárigeriniń qaýlysyna sáıkes, olar 14 kúnge karantınge jiberiledi, - dep atap ótti Sádýaqas Baıǵabulov.
«Tıisinshe, zerthanalyq zertteýler jasalady, taldamalar alynady, birqatar test jasalady. Eger olar teris nátıje kórsetse jáne densaýlyq jaǵdaıy turaqty bolsa, onda olar turǵylyqty jeri boıynsha on kún boıy baqylaýda bolady».
