Pavlodarda Dostyq aýylynyń turǵyndary aýyzsýdy áli kúnge deıin tasyp ishýge májbúr

PAVLODAR. KAZINFORM - Pavlodar qalasynan shamamen 50 shaqyrym jerde ornalasqan aýyl turǵyndary áli kúnge deıin aýyzsýdy qudyqtan tasýǵa májbúr. Bıyl eldi mekende sý qubyryn tartý jumystary bastalýy tıis bolǵanymen, qarasha aıyna deıin qurylys jumystary qolǵa alynbaǵan.

aýyzsý
Foto: threads.com/@riza_yesbulatova

Bul másele áleýmettik jelide kóterildi. Turǵyn Rıza Esbolatova Threads áleýmettik jelidegi jazbasynda Dostyq aýyl adamdarynyń aýyzsý máselesin kótergen. 

Onyń aıtýynsha, aýyl halqy sýdy áli kúnge deıin sý kolonkasynan tasıdy. Al sý qubyryn tartý jumystary 2026 jyly bastalady dep josparlanǵanymen, turǵyndar ázirshe qurylys bastalǵanyn kórmegen.

Máselege qatysty Pavlodar aýdanynyń ákimi Dıdar Ibraev túsinikteme berdi. Onyń aıtýynsha, Chernoretsk aýyldyq okrýgine qarasty Dostyq aýylyndaǵy sý qubyryn rekonstrýktsııalaý jáne salý jobasynyń jobalyq-smetalyq qujattamasy bıyl qańtar aıynda memlekettik saraptamadan oń qorytyndy alǵan. Odan soń merdiger uıymdy anyqtaý maqsatynda memlekettik satyp alý konkýrsy jarııalanǵan.

– Jobanyń jalpy quny – 1,3 mlrd teńge. Kelisimshart 2026–2027 jyldarǵa arnalǵan eki jyldyq merzimge jasaldy. Sonymen qatar avtorlyq jáne tehnıkalyq qadaǵalaý qyzmetterin kórsetý boıynsha da kelisimsharttar jasaldy. Qazirgi ýaqytta qurylys materıaldaryn satyp alý jáne negizgi qurylys-montaj jumystaryna daıyndyq júrgizilip jatyr. Jumystardy kelesi jyldyń kókteminde bastaý josparlanǵan, – deıdi Dıdar Ibraev.

Saraptama qorytyndysyna sáıkes, qurylys-montaj jumystaryna bes aı ýaqyt qarastyrylǵan. Jobany tolyq aıaqtaý 2027 jylǵa josparlanyp otyr.

Eske sala keteıik, Pavlodar óńirindegi aýyldarda aýyzsý synamalarynyń 150-den astamy talapqa saı bolmaı shyqty.