Pavlodarda Dostyq aýdanyna tramvaı jolyn salýǵa 2,7 mlrd teńge bólinedi
PAVLODAR. KAZINFORM - Pavlodarda relsti kóliktiń keleshegi zor. Tramvaıdyń ekologııalyq jaǵynan tıimdi ári qaladaǵy kólik ınfraqurylymyn damytýda mańyzdy ról oınaıtynyn ekenin eskersek, jergilikti tehnıkalyq parkti jańartý asa ózekti. Máselen jańadan ósip kele jatqan Dostyq shaǵyn aýdanyna tramvaı jolyn salýǵa 2,7 mlrd teńge qarastyrylyp otyr.
Memleket basshysy Qasym-Jomart Toqaev 2022 jyly óńirimizge jumys saparymen kelgende Pavlodar qalasyndaǵy tramvaı júıesin damytýdy jalǵastyryp, quramdardy jańartýdy jedeldetý qajettigin tapsyrǵan edi.
«Menińshe, Pavlodarda tramvaıdy saqtap qalý qajet. Eger qajet bolsa, joldardy jańǵyrtyp, jańa, dybyssyz, tramvaılar satyp alý kerek shyǵar. Biraq tramvaı – ózinshe tartymdy kólik túri. Eýropanyń kóptegen damyǵan qalalarynda tramvaılar kedergisiz júredi. Bul – jergilikti turǵyndar unatatyn ekologııalyq jáne yńǵaıly kólik. Tramvaı júıesin damytýdy jalǵastyryp, quramdardy jańartýdy jedeldetý kerek», degen edi Prezıdent.
Qazirgi ýaqytta oblys bıligi men Pavlodar tramvaı parki ekologııalyq jaǵynan tıimdi kólikti damytýdyń joldaryn izdestirip jatyr. Eń áýelgi maqsat – parktegi eskirgen vagondardyń ornyna jańalaryn satyp alý. Qazirgi ýaqytta mekemede 111 tramvaı vagony bar bolsa, kún saıyn 73 tramvaı jelige shyǵady. Al vagondardyń tozý deńgeıi shamamen 73 paıyzdy quraıdy.
Shahar rámiziniń birine aınalyp úlgergen relsti kólik ekologııalyq jaǵynan da tıimdi. Aldaǵy ýaqytta qalanyń shetkeri shaǵyn aýdandaryna da avtonomdy tramvaılar júre bastaıdy dep kútilip otyr. Bul úshin Eýropa qaıta qurý jáne damý banki jańa tramvaılar satyp alýǵa 5 mlrd teńge qarajat bóletin boldy.
Jańa vagondar avtonomdy, ıaǵnı akkýmýlıatordyń kómegimen júrý múmkindigine ıe.
«Bir tramvaıdyń quny shamamen 338-447 mln teńge aralyǵynda bolady dep kútilýde. Jaqyn arada tehnıkalardy satyp alýǵa konkýrs jarııalanyp, onyń qorytyndysynda vagondardy jetkizýshi el anyqtalady. Tehnıkalyq sıpattamalar boıynsha vagonnyń uzyndyǵy - 17 metr, syıymdylyǵy 124 adamǵa shaqtalǵan, al esik sany úsheý bolýy kerek. Pavlodar tramvaı parkindegi tramvaılardyń kóbinde tómen deńgeıli eden qarastyrylmaǵan. Saldarynan múmkindigi shekteýli adamdar men qarııalardyń túsip-minýine qolaısyz. Bul jaǵdaı jańa vagondarda eskeriledi. Buǵan qosa onda pandýspen jabdyqtalǵan esik te bolady»,-dep habarlady Kazinform tilshisine Pavlodar oblysy ákimdiginen.
Jergilikti bılik endigi kezekte shahardaǵy tramvaı joldaryn uzartýdy oılastyryp otyr. «Dostyq» shaǵyn aýdanyna jolaýshylardy jetkizý úshin jańadan satyp alynatyn avtonomdy vagondar baǵyttalady. Joǵaryda aıtqandaı, tramvaılar qýattalǵan akkýmýlıatordyń kómegimen jyljıtyn bolady. Elektr baǵandary men symdardyń qajeti joq. Mundaı avtonomdy tramvaılardy iske qosý shahardaǵy keleshegi zor jańa jelilerdi ómirsheń etýge múmkindik beredi. Mysal úshin, Ekinshi Pavlodar men Ýsolka shaǵyn aýdandarynda jańa tarmaqtar paıda bolýy ǵajap emes. Eger kózdelip otyrǵan jobadan qarjy únemdelse, jańa tarmaqtar salynady. Ásirese, Ekinshi Pavlodar shaǵyn aýdanynda tramvaı júrgizý – kópten beri qozǵalyp kele jatqan másele. Sebebi bul aýmaqtaǵy turǵyndar avtobýs marshrýttarynyń azdyǵyna jáne olardyń mejeli ýaqytynan kóp keshigetinine jıi shaǵymdanady. Ásirese qys mezgilinde problema kóp týyndaıdy. Eger tramvaı tarmaǵy salynsa, jolaýshylardyń júrip-turýy jeńildeı túser edi. Qazirgi kúni Nazarbaev dańǵyly, Estaı, Malaısary kósheleri arqyly shaǵyn aýdanǵa jańa relsti jol salý kózdelip te otyr. Jańa tarmaq Rossııskaıa kóshesi arqyly aınalyp, Nurmaǵambetov kóshesine túsedi de, Temirjol vokzalyna keledi. Osylaısha, qalanyń shyǵys aýmaǵynda relsti joldyń tolyq tsıkli paıda bolýy múmkin. Jobalaýshylar buǵan balama retinde Gerıng jáne Suraǵanov kóshelerin de usynady. Qala bıligi bul eki jobanyń qaısysy qarjy jaǵynan tıimdi bolady dep oılanyp otyrǵandaı.
Oblys bıligi «Dostyq» shaǵyn aýdanyna jalpy quny 2,7 mlrd teńge turatyn tramvaı jelisin salýdyń jobasyn ázirlep qoıǵan. Ol búginde memlekettik saraptamadan ótip jatyr.
