Pavlodarda donor áıel tórt adamnyń ómirin uzartýǵa sebepshi boldy

PAVLODAR. KAZINFORM — Pavlodarda donorlyq aǵzalardy ajyratyp alý boıynsha biregeı ota jasaldy. 39 jastaǵy donor áıel ınsýlt saldarynan qaıtys bolǵan. 

Óńirlik transplantatsııa jónindegi úılestirýshi Dmıtrıı Poterebýhtyń aıtýynsha, gemarragııalyq ınsýlt saldarynan kóz jumǵan 39 jastaǵy áıeldiń kúıeýi men uly donorlyqqa kelisimderin bergen.

Áıel adam oblystyq kardıologııalyq ortalyqqa 22 qańtar kúni túsip, dárigerler oǵan «bas mıynyń ólýi» dıagnozyn qoıǵan eken.

— Árıne, marqumnyń týystary úshin sheshim qabyldaý ońaıǵa soqpaǵany anyq. Mıdyń ólýi degenimiz, ol adamnyń endi bu dúnıelik emes ekenin bildiredi. Kúıeýi men uly úshin áıeldiń ólimi óte jaısyz habar boldy. Biz olardy jansaqtaý bólimshesine kirgizip, áıeldiń júregi soǵyp jatýyna jasandy tynys aldyrý apparatyna qosylýy jáne berilip jatqan preparattar sebepshi bolyp otyrǵanyn túsindirdik, — deıdi transplantolog.

Pavlodarǵa kelgen dárigerlik toptyń quramynda Ulttyq ǵylymı onkologııalyq ortalyǵynyń, Ana men bala ortalyǵynyń mamandary, University Medical Center (UMC) kardıohırýrgteri bolǵan. 

Aǵza múshelerin ajyratý boıynsha ota oblystyq kardıologııalyq ortalyqta júrgizilgen. Donor-áıeldiń júregi, eki búıregi, baýyry jáne eki kóziniń qasań qabyqtary alynǵan. 

Buǵan deıin Pavlodar óńirinde 200-den astam adam aǵzasyn aýystyrýǵa muqtaj ekeni týraly jazǵanbyz.