Pavlodarda dóńgelegi jarylyp, tuzdy kólge túsip ketken kólik júrgizýshisi qutqaryldy
PAVLODAR. KAZINFORM — Ekibastuz-Maıqaıyń avtojolynda dóńgelek shınasy jarylýy saldarynan jeńil kólik jol shetindegi tuzdy kólge túsip ketken.
Bul týraly óńirlik tótenshe jaǵdaılar departamentiniń baspasóz qyzmetinen habarlady.
— Ekibastuz-Maıqaıyń avtojolynda 1985 jyly týǵan júrgizýshi dóńgelek shınasynyń jarylýy saldarynan kólikti basqara almaı, joldan Tuz kóline túsip ketken. Kólikte jalǵyz bolǵan er adam salonnan kóliktiń tóbesine óz betimen shyqqan. Oqıǵaǵa kýá bolǵan adamdar 112 nómirine qońyraý shalyp, bolǵan jaıtty habarlady, — dep málimdedi departtamenttiń baspasóz qyzmetinen.
Kásibı qutqarýshylar zardap shegýshini jaǵaǵa jetkizip, jedel medıtsınalyq járdem brıgadasyna tabystaǵan. Sondaı-aq, kólik quralyn da sýdan súırep alyp shyqty. Tótenshe jaǵdaı qyzmetiniń mamandary kólik quraldarynyń tehnıkalyq jaǵdaıyn únemi tekserip otyrýdyń mańyzdy ekenin eske salady.
Eske sala keteıik, Pavlodar-Astana jolynda balalar mingen avtobýs aýdarylyp, jattyqtyrýshy kóz jumdy.