Pavlodarda dızeldi joǵary baǵamen satqan kompanııalar jaýapkershilikke tartyldy
«Qarjylyq monıtorıng agenttiginiń Pavlodar oblysy boıynsha Ekonomıkalyq tergeý departamentinen kelip túsken materıaldardyń negizinde, Tabıǵı monopolııalardy retteý komıtetiniń Pavlodar oblysy boıynsha departamenti «Alıev V.G.» JK, «Aleksandrov I.M.» JK jáne «Proektno-stroıtelnaıa kompanııa «GRAND» JShS-i Pavlodar qalasynyń aýmaǵynda dızel otynyn joǵary baǵamen satqanyn anyqtady.
Olar «Munaı ónimderiniń jekelegen túrlerin óndirýdi jáne olardyń aınalymyn memlekettik retteý týraly» QR Zańynyń 14-babynyń 3-tarmaǵyn buzǵan. Memlekettik retteý baǵalary belgilengen munaı ónimderin bólshek saýdada ótkizýdiń shekti baǵasynan asyp ketti.
TMRKD quqyq buzýshylarǵa qatysty QR Ákimshilik quqyq buzýshylyq týraly kodeksi 171-babynyń 1-bóligi boıynsha ákimshilik is júrgizýdi qozǵady. Osy baptyń sanktsııasy shaǵyn kásipkerlik sýbektilerine 100 AEK mólsherinde aıyppul salýdy kózdeıdi, bul – 306 300 teńge, orta kásipkerlik sýbektilerine 200 AEK mólsherinde, bul – 612 600 teńge», - delingen resmı habarlamada.
Іs boıynsha materıaldar Pavlodar qalasynyń Ákimshilik quqyq buzýshylyqtar jónindegi mamandandyrylǵan sotynyń qaraýyna joldandy.
«Ákimshilik jaza qoldanylǵannan keıin bir jyl ishinde qaıtalap jasalǵan quqyq buzýshylyq úshin akkredıtteý týraly kýáliktiń qoldanylýyn toqtata turyp ne odan aıyra otyryp, Ákimshilik quqyq buzýshylyq jasaý nátıjesinde alynǵan kiristiń (túsimniń) júz paıyzy mólsherinde aıyppul kózdelgenin eskergen jón.
Osynyń saldarynan munaı ónimderin bólshek saýdada ótkizýdi júzege asyratyn kásipkerlik sýbektileri munaı ónimderin ótkizý salasyndaǵy zańnamanyń talaptaryn qatań saqtaýy jáne belgilengen shekti baǵalardan joǵary satýǵa jol bermeýi tıis.
Tutynýshylar, óz kezeginde, janar-jaǵar maı baǵasynyń ósý faktileri anyqtalǵan jaǵdaıda, rastaıtyn materıaldardy qosyp, Departamentke tıisti ótinishpen júginýi kerek», - dep tolyqtyrady vedomstvonyń baspasóz qyzmeti.
