Pavlodarda dıirmenderdiń úshten ekisi shıkizat jetispeýshiliginen toqtap tur

PAVLODAR. KAZINFORM – Qazir óńir boıynsha nebári 8 dıirmen jumys isteıdi. Onyń ózinde nysandardyń júktemesi 30 paıyzdan aspaıdy. 

Pavlodar oblysynyń qaıta óńdeýshiler qaýymdastyǵynyń tóraǵasy Janar Serimovanyń aıtynsha, aımaqta 21 dıirmen bar. Alaıda sonyń tek 8-i ǵana jumys istep tur.

– Jumys istep turǵan dıirmender nebári 30 paıyz júktememen tabystaryn áreń taýyp tur. Bul – turaqty shıkizattyń jetispeýinen. Bizdiń kásiporyndar jyl on eki aı boıy bıdaı satyp alýǵa daıyn, biraq ol bizge jetpeıdi. Arzan baǵadaǵy qazaqstandyq bıdaı Aýǵanstan men Ózbekstanǵa eksportqa ketip jatyr. Al otandyq qaıta óńdeýshiler naryqtan tys qalyp otyr. Jaǵdaıdyń ýshyǵýyna Reseı unynyń basymdylyǵy da áser etýde. Biz bıdaıdyń eksportyn qoldaımyz. Biraq bıdaıdy unǵa aınaldyryp satý tıimdirek emes pe? Qazir barlyq naryq reseılik unǵa toly. Bizdiń sala 14 jyldan beri damymaı, bir orynda turyp qalǵandaı. Kezinde oblysta 150 dıirmen bolatyn. Qazir onyń jartysy mal azyǵyna arnalǵan un ǵana shyǵarady, - deıdi ol.

Kásipkerlerdiń sózinshe, qosylǵan qun salyǵyn qaıtarý da kúrdeli bolyp tur. Biraq eń bastysy – shıkizattyń tapshylyǵy. 

Eske sala keteıik, Májilis depýtaty Murat Ergeshbaev Qytaıda Qazaqstan unyn satatyn ókildik qurýdy usynǵan edi.