Pavlodarda dezınfektsııalyq zattardyń baǵasyn qymbattatqan quqyqbuzýshy jaýapqa tartyldy
NUR-SULTAN. QazAqparat – Pavlodar oblysynda dezınfektsııalyq zattar baǵasyn negizsiz asyryp satý faktisi anyqtaldy, dep habarlaıdy QazAqparat.
Bul týraly QR Qarjy mınıstrligi Qarjy monıtorıngi komıtetiniń baspasóz qyzmeti habarlady.
«2020 jyldyń 18 naýryzynda QR QM Qarjy monıtorıngi komıtetiniń Pavlodar oblysyndaǵy Ekonomıkalyq tergeý departamentiniń qyzmetkerleri jedel-izdestirý sharalaryn júrgizdi. Shara barysynda turǵyndarǵa antıseptıkalyq zattardyń baǵasyn negizsiz asyryp satý faktisiniń aldyn aldy», - delingen habarlamada.
Quqyqbuzýshydan jalpy kólemi 212 lıtr dezınfektsııalyq antıseptık zattar tárkilendi. Ol antıseptıkalyq zattardy óndirýshi-zaýyttan 2500 teńgege alyp, turǵyndarǵa 4000 teńgege satqan.
Respýblıkadaǵy tótenshe jaǵdaıǵa oraı, ashyq satylymdaǵy dári-dármek bir adamǵa 1 lıtrden aspaıtyn kólemde satylady. Qazirgi ýaqytta tergeý amaldary júrgizilýde.
Pavlodar oblysyndaǵy Ekonomıkalyq tergeý deparatmenti oblystyq ákimshilikpen jáne óndirýshi zaýyttarmen birlese otyryp, bastapqy qajettilik taýarlarynyń qylmystyq alyp-satý faktileriniń aldyn-alý sharalaryn júrgizedi.
«Qurmetti Pavlodar oblysynyń turǵyndary men qonaqtary! Eger medıtsınalyq maskalardy, qolǵaptardy, dezınfektsııalyq jáne antıseptıkalyq zattardy negizsiz qymbat baǵada satý faktilerine kýá bolsańyz, QR QM Qarjy monıtorıngi komıtetine – 8 (7172) 70-84-78, Pavlodar oblysyndaǵy Ekonomıkalyq tergeý departamentine – 8 (7182) 61-33-05, 8 (702) 816-01-81 nemese Nur-Sultan q., Beıbitshilik kóshesi, 10, Pavlodar q., Tolstoı kóshesi, 98 mekenjaılaryna júginýińizdi suraımyz», - dep málimdedi komıtet.
