Pavlodarda der ýaqytynda dıagnoz qoıa almaǵan dárigerler jazalandy
PAVLODAR. QazAqparat - Pavlodarlyq áıelge ınsýlt dıagnozyn der kezinde qoıa almaǵan medıtsına qyzmetkerleri tártiptik jaýapkershilikke tartyldy, dep habarlaıdy «QazAqparat» HAA tilshisi.
«Atalǵan oqıǵa boıynsha bas dárigerler men orynbasarlarǵa shara qoldanyldy. Naýqas aldymen bir aýrýhanaǵa barǵan. Ol jerdegi dáriger jas, biliktiligi tómen bolǵandyqtan aýyryp turǵan adamdy jibere salǵan. Ekinshi márte ınsýlt ortalyǵyna jatqyzylǵanda, patsıentke tolyq kólemde kómek kórsetildi. Biraq biz keshigip qaldyq. Árıne, bizde túzetýdi talap etetin kemshilikter bar», -dedi Pavlodar oblystyq densaýlyq saqtaý basqarmasynyń basshysy Oraz Muqashev.
O.Muqashevtiń aıtýynsha, Dýbovskıh qaralǵan oblystyq aýrýhana mundaı jaǵdaılar qaıtalanbas úshin tájirıbesi mol mamandarmen kúsheıtilgen. Endi olar demalys kúnderi, ásirese meıramdarda kezekshilik atqarady.
Eske sala keteıik, Irına Dýbovskıh bas aýrýy, júrektiń aınýy jáne ózge de sımptomdarǵa shaǵymdanyp, dárigerlerge birneshe márte kelgen. Onyń jaǵdaıy kún sanap nasharlaǵan. Basynyń qatty aýyryp turǵanyn aıtyp, kezekti ret kelgende dárigerler ony qorqatyn eshteńe joq dep jubatqan. Keıin densaýlyǵy tipti nasharlaı túsken áıel aýrýhanaǵa jatqyzylyp, oǵan ınsýlt dıagnozy qoıylǵan. 5 qańtar kúni ota jasalyp, 8 qańtar kúni ol kóz jumdy. I.Dýbovskıhtyń balalary oblystyq aýrýhanany sotqa berdi.
