Pavlodarda depýtattardyń 30 paıyzǵa jýyǵy áıelder
ASTANA. QazAqparat - Dostyq úıinde «Áleýmettik saıasattaǵy jáne jergilikti ózin-ózi basqarý máselelerindegi keshendi genderlik tásildiń qaǵıdalary» atty semınar-trenıng ótti, dep habarlaıdy pavlodarnews.kz.
Sharaǵa QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Elena Tarasenko jáne Pavlodar oblysy ákiminiń orynbasary, oblys ákimi janyndaǵy áıelder isteri jáne otbasylyq-demografııalyq saıasat jónindegi ulttyq komıssııa tóraǵasy Meıram Begentaev qatysty.
QR Prezıdentiniń janyndaǵy áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Elena Tarasenko semınardyń maqsaty genderlik teńdikti saqtaýǵa, sheshim shyǵarýda áıelderdiń de aralasýyn arttyrýǵa jáne basqarý oryndarynda áıelderdi belsendi etýge baǵyttalǵanyn atap ótti.
«Bul semınar komıssııamyzǵa júktelgen mindetterdiń biri. Ár óńirde ótkizip kelemiz. Pavlodarda óte belsendi áıelder bar ekenin bilemiz. Óńirdegi úkimettik emes uıymdardaǵy áıelder de jaqsy jumys jasaıdy. Aýyl ákimderiniń arasynda áıelder kóp ekenin bildik. Búgingi semınarda basqarý isteri, sheshim shyǵarý boıynsha jetekshilerge jolyǵatyn suraqtarǵa jaýap alynatyn bolady. Oǵan qosa, qalaı ózińdi kóshbasshy retinde kórsetý kerektigin bilý arqyly saılaýǵa daıyndalý, jergilikti basqarý, zańdaǵy qazirgi ózgerister, kúshin joıǵan sheshimder jóninde trenıngter ótedi, - dedi Elena Tarasenko.
Elena Tarasenko elimizde depýtattar korpýsynda áıelderdiń úlesi 30 paıyz bolsa, óńirler boıynsha Qostanaıda bul kórsetkish 31,6 paıyz ekenin atap ótti.
Al, Pavlodar oblysynda áıel depýttattardyń sany 29,6 paıyzdy quraıdy.
