Pavlodarda depýtatpen kezdesýde ishki sý tasymaly salasyndaǵy problemalar kóterildi
ASTANA. KAZINFORM – Májilis depýtaty, Jalpyulttyq sotsıal-demokratııalyq partııasy fraktsııasynyń jetekshisi Ashat Rahymjanov Pavlodar oblysyna jumys sapary barysynda oblystyń órt sóndirý bólimsheleri men jedel-qutqarý jasaǵyna bardy.
Májilismen Pavlodar oblysy Tótenshe jaǵdaılar departamenti bastyǵynyń mindetin atqarýshy azamattyq qorǵaý polkovnıgi Qaırat Shaımardenov jyl basynan beri departament bólimsheleri avarııalyq-qutqarý jáne shuǵyl jumystar boıynsha 1,6 myńnan astam sapar júrgizgenin baıandady. Nátıjesinde 101 adam qutqarylyp, 173 adam evakýatsııalanǵan. Tórt zardap shekken azamatqa dárigerge deıingi medıtsınalyq kómek kórsetildi.
– Bıyl «Ertis ormany» memlekettik tabıǵı orman rezervaty ormandardaǵy órtterdi erte anyqtaý jáne aldyn alý úshin tsıfrlyq júıeni ornatty. Orman órtterin erte anyqtaý júıesine arnalǵan 23 munara qondyryldy, biraq bul qutqarý qyzmetin kúsheıtýge jetkiliksiz, – dedi Qaırat Shaımardenov.
Depýtatpen kezdesýde órt sóndirýshiler men qutqarýshylar sheshimin talap etetin birqatar túıtkildi máseleni aıtty. Onyń ishinde barlyq bólimshede kúrdeli jóndeý jumystaryn júrgizýge, oblystyq basqarmaǵa qajetti qosymsha qondyrǵylardy salýǵa qarajattyń joqtyǵy. Qosymsha tehnıkalyq qural-jabdyqtar da qajet. Bul rette memlekettik satyp alý júıesi qoldanystaǵy tehnıkanyń ózine ýaqytynda qyzmet kórsetýge múmkindik bermeıdi.
Taǵy bir másele – áleýmettik qaýipsizdik. Іshki ister mınıstrligi, Qorǵanys mınıstrligi jáne basqa qurylymdardyń áskerı qyzmetshilerine qaraǵanda órt sóndirýshilerge turǵyn úı tólemderi, shıpajaılyq-kýrorttyq emdelý, balabaqshalar men mektepterde jeńildikter qarastyrylmaǵan.
Sonymen qatar Tótenshe jaǵdaılar mınıstrligine órt sóndirý kóligi júrgizýshilerin qabyldaý tártibi kúrdelengen. Óıtkeni olar Іshki ister mınıstrliginiń standarttary boıynsha Polıtsııa departamentiniń emhanasynda áskerı-dárigerlik komıssııalardan ótedi.
Oqıǵa ornyna jedel jetýge kedergi keltiretin jol jabynynyń sapasyzdyǵy, dalalyq aımaqta baılanystyń joqtyǵy da jumysty tejep otyr. Qutqarýshylardyń aıtýynsha, olar tájirıbeden ótken spýtnıktik baılanysty paıdalaný árqashan jeńil ári yńǵaıly bola bermeıdi.
Ashat Rahymjanov qutqarýshylardyń tıimdi jumysynyń mańyzdylyǵyna nazar aýdaryp, qaýip-qaterge tap bolǵan qazaqstandyqtardyń ómiri olardyń qyzmetine tikeleı baılanysty ekenin atap ótti. Sondaı-aq kóterilgen máselelerdi óz baqylaýyna alatynyn aıtty.
