Pavlodarda dene shynyqtyrý sabaǵy kezinde 7 oqýshy kúıip qaldy
PAVLODAR. KAZINFORM - Bir top oqýshy bótelkedegi sýsynǵa «Krot» qubyr tazartqysh quralyn salyp, onymen fýtbol oınaǵan. Plastık bótelke jarylyp, 7 balany hımııalyq kúıik shaldy.
Jazataıym oqıǵa oblys ortalyǵyndaǵy №37 orta mektepte dene shynyqtyrý sabaǵy kezinde bolǵan. 6-synyptyń bir top oqýshysy siltili «Krot» qubyr tazartqysh quralyn sýsyn quıylǵan plastık bótelkege salǵan. Ony fýtbol doby retinde paıdalanyp oınap júrgende bótelke jarylyp ketken. Oqıǵa ornynda jeti bala kúıip qalǵan.
- Jedel járdemge shaqyrtý búgin saǵat 12.49-da tústi. Oqıǵa ornyna eki jedel járdem brıgadasy jiberildi. Anyqtalǵandaı, jeti bala zardap shekken. Balalardyń qol saýsaqtaryn, bet-álpetteri men kózderin kúıik shalǵan. Oqýshylar álgi jerde «krot»+mohıto+folga hımııalyq zattaryn paıdalanyp, oıyn oınaǵan. Zardap shekken jasóspirimderdiń barlyǵy oblystyq balalar aýrýhanasyna jetkizildi. Patsıentterdiń jaǵdaıy aýyr emes, - dep habarlady óńirlik jedel járdem stansasynan.
Oqıǵa ornynda medıtsına qyzmetkerlerimen qatar, órt sóndirýshiler, qutqarýshylar jáne Apattar medıtsınasy ortalyǵynyń mamandary da jumys istedi
Eske sala keteıik, Pavlodarda 9 jáne 10 aılyq sábıler hımııalyq tazartqyshtan kúıip qaldy.