Pavlodarda daýyl qala mańyndaǵy kenttiń úsh kóshesin alaı-dúleı etti
PAVLODAR. QazAqparat - Pavlodar qalasyna kiretin Kenjekól aýylynda túnde 10-30 mınýt aralyǵynda qatty jel turyp, úsh kóshedegi úılerge zaqym keldi, dep habarlady «QazAqparat» HAA tilshisi.
Kúshti daýyl Kenjekól kentine ońtústik jaqtan keldi, deıdi jergilikti turǵyndar. Olardyń aıtýynsha, birshama ýaqyt úsh kóshede alaı-dúleı daýyl turyp, artynsha jaýyn jaýǵan. Qap-qara bolyp úıirilgen jel Ertis ózeni arqyly batysqa qaraı ketti. Jurt uıqyda jatqanda daýyl shatyrdy julyp, qorshaýlardy qulatyp ketti. Endi halyq úılerin qalpyna keltirýde.
Apat keltirgen shyǵyn kólemin ákimdik jáne TJD komıssııasy baǵalaıdy. Kenjekól aýylynyń ákimi Asylhan Mánkeevtiń aıtýynsha, tańǵy jetiden bastap ákimdik mamandary eldi mekendi aralaı bastaǵan.
«Daýyl jańa shaǵyn aýdandy zaqymdady, - dep habarlady A. Mánkeev. - Gýlıakın, Taýkov, Shermuhamedov kóshelerinde on-on bes shaqty úı zardap shekti, tipti 7-8 elektr baǵany da qulady. Qazir qalpyna keltirý jumystary bastaldy. Erteń elektr jelileri qalpyna keltiriledi».
