Pavlodarda dáýlesker kúıshi Rústembek Omarovtyń dombyrasy saqtalyp tur
PAVLODAR. KAZINFORM - Bıyl Qazaq KSR-iniń halyq ártisi, Qurmanǵazy atyndaǵy qazaq ult aspaptar orkestriniń bas dombyrashysy, dáýlesker kúıshi, Ertis – Baıan óńiriniń týmasy Rústembek Omarovtyń týǵanyna 105 jyl toldy. Óner ıesiniń Qurmanǵazy orkestrinde ustaǵan kóne dombyrasy jergilikti mýzeıde saqtalyp tur.
Qazaqtyń kúıshilik óneriniń damýy HІH ǵasyrda óz shyńyna jetip, Qurmanǵazy, Dáýletkereı, Táttimbet, Qazanǵaptyń shyǵarmalary ult mádenıetiniń altyn qoryna aınaldy. Mine, osy qazynany kelesi urpaqqa jetkizýshilerdiń biri – dástúrli kúıshilerdiń jolyn jalǵastyrýshy, Qazaq KSR-iniń halyq ártisi, Qurmanǵazy atyndaǵy qazaq ult aspaptar orkestriniń bas dombyrashysy, Ertis – Baıan óńiriniń týmasy Rústembek Omarov. Bala shaǵynda dombyra tartýdy ákesinen úırenip, keıin Salyq, Toqbaı, Temirbolat syndy ánshi-jyrshylardyń ortasynda júrdi. Ol nebári 15 jasynda jańadan qurylǵan qazaq ult aspaptar orkestrine dombyrashy retinde qabyldanǵan. R.Omarovtyń oryndaýyndaǵy halyq kúıi «Aqsaq qulan», Qurmanǵazynyń «Aqsaq kıik», «Jıma», «Mashına», «Qyzyq qaıyń», «Serper», Dınanyń «Baıjuma», Káýenniń «Sánaý», Abyldyń «Naratý», t.b. kúıleriniń nusqalary keń taralyp, dombyrashylardyń repertýaryna endi. Táttimbettiń «Sylqyldaq», «Sarjaılaý» kúıleriniń nusqalary áli kúnge ult aspaptar orkestrimen oryndalyp keledi.
Dombyrashynyń oryndaý mánerin Ahmet Jubanov óte joǵary baǵalap, óziniń «Ǵasyrlar pernesi» atty eńbeginde: «Rústembek kúıdi «shegelep», shapshań, jaı keletin býyndaryn bárin de tastaı túıip, ekpinin aýystyrmaıdy. Ortasha uzyndyqtaǵy saýsaqtarymen bir notany jaza baspaı, bárin de óz ornynda etip oryndaıdy» dep jazǵan.
Al kirpııaz kúıshi-anamyz Dına Nurpeıisova: «Osy shodyrym (Rústembektiń betinde sheshektiń qorasan daǵy bolǵan) shákirt bolýǵa jaraıdy», dep sońyna ertip, batasyn bergen eken.
Rústembek Omarov Ekinshi dúnıejúzilis soǵysqa qatysqan. Maıdandaǵy keskilesken urystardyń birinde bólim jaýyngerlerimen birge tutqynǵa túsip, Norvegııa jerinde kontslagerde bolǵan. Tutqynda júrse de dombyrashylyq ónerin tastamaı, ózi qoldan jasaǵan dombyramen nemis ofıtserlerin tań-tamasha etken.
Ol soǵystan keıin orkestrdegi qyzmetin jalǵastyrdy. Bal barmaq kúıshiniń qoly tıgen bul dombyra uzaq jyl Qurmanǵazy atyndaǵy ult aspaptar orkestrinde bolǵan. Ony qyzy Qarlyǵash Omarova ákesiniń 100 jyldyq mereıtoıynda, 2019 jyly, Buqar jyraý atyndaǵy ádebıet jáne óner mýzeıine tapsyrǵan. Al óner ıesiniń jeke ustaǵan dombyrasy joǵalyp ketken.
Búginde Pavlodar oblysyndaǵy qazaq ult aspaptar orkestri R.Omarovtyń esimimen atalady.
Eske sala keteıik, Pavlodarda daýylpaz aqyn Isanyń dombyrasy tabyldy.
