Pavlodarda daýylǵa baılanysty basqarma basshysy qyzmetinen bosatyldy
Pavlodar oblysynyń ákimi Energetıka jáne turǵyn úı-komýnaldyq sharýashylyq basqarmasynyń basshysy Erjan Salhanovty qyzmetinen bosatty. Sheshim daýyl saldaryn joıýǵa arnalǵan májilis barysynda jarııalandy, dep habarlaıdy Kazinform.
Qarashanyń 18-nen 19-na qaraǵan túni Pavlodar oblysynda kúshti jel 83 áleýmettik nysannyń shatyryp julyp ketti. Sondaı-aq 63 kópqabatty jáne 80-nen astam jer úıge zaqym kelip, 18 aýyl osy ýaqytqa deıin jaryqsyz otyr.
Tabıǵattyń dúleı kúshiniń saldarymen kúresý jáne zaqym kelgen nysandardy qalpyna keltirý úshin oblystyń 9 aýdanynda tabıǵı apatqa baılanysty tótenshe jaǵdaı jarııalandy.
Bul týraly resmı túrde kúndiz jarııalanyp, keshkisin ákimdikte májilis ótti.
Jınalys qorytyndysy boıynsha Erjan Salhanov ózine senip tapsyrylǵan salany baqylaýdy álsiretip alǵany úshin qyzmetinen bosatyldy.
Sonymen qatar óńir basshysy Asaıyn Baıhanov qala, aýdan jáne keıbir oblystyq vedomstvolardyń jumysyna qanaǵattanbaıtynyn jetkizdi. Soǵan qaramastan ózge sheneýnikter óz oryndarynda qaldy.
Asaıyn Baıhanov monopolıstiń jumysyn da synady. Ákimge elektr qýatyn qalpyna keltirý jumystary unamaıdy. Osy sebepti Asaıyn Baıhanov «Pavlodarenergo» AQ bas dırektory Oleg Şemeldi qalyptasqan jaǵdaımen jeke aınalysýdy tapsyrdy.
«Mine, 18 aýyldyń elektr qýatynsyz otyrǵanyna úsh táýlik boldy. Bul degenińiz olar úsh táýlik boıy jaryqsyz, baılanyssyz otyr degen sóz, keıbirinde tipti sý da joq. Kóptegen turǵyndar uzaq janatyn pesh pen sý soratyn nasostardy qoldanady. Olar elektr qýatynsyz jumys istemeıdi. Men shuǵyl túrde qalpyna keltirý jumystaryn qaıta quryp, oǵan ózge kúshterdi de tartýdy tapsyramyn. Eger qoldaryńyzdan kelmese bizden kómek suraýlaryńyz kerek edi», - dedi oblys ákimi «Pavlodarenergo» AQ basshylyǵyna qarata aıtqan sózinde.
