Pavlodarda dárigerler naýqasty reanımobılge zembilmen eki shaqyrym boıy kóterip jetkizdi
PAVLODAR. QazAqparat – Qar qalyń jaýǵandyqtan jedel járdem kóligi ınfarkt alǵan 67 jastaǵy patsıenttiń úıine jete almaı qalǵan, dep habarlaıdy QazAqparat tilshisi.
«Oqıǵa qańtardyń 25-inen 26-syna qaraǵan túni Pavlodar mańyndaǵy Jetekshi aýylynda bolǵan. Júrek tusy aýyrǵany jónindegi qońyraýǵa kardıologııalyq brıgada jiberildi, alaıda ol jerge kelgen medıtsına qyzmetkerleri úıge jete almaǵan. Joldy qar basyp qalǵan. 103 qyzmetiniń qyzmetkerleri naýqastyń úıine deıin jaıaý júrýine týra kelgen. Er adamǵa ókpe isinýi dıagnozy qoıyldy», - dep habarlady Pavlodar oblysynyń jedel járdem stansasynyń baspasóz qyzmeti.
Oǵan alǵashqy kómek kórsetken dárigerler naýqasty zembilmen eki shaqyrym jaıaý júrip, reanımobıl kóligine deıin alyp ketken. Qarańǵy túsken ýaqyt pen qar qursaýyna qaramastan naýqasty statsıonarǵa jetkizdi, qazir onyń ómiri men densaýlyǵyna esh qaýip tónip turǵan joq.
«Pavlodar oblysynyń ishki joldary aýa raıynyń qolaısyzdyǵyna baılanysty jabyq ekenine qaramastan, jedel járdemniń sanıtarlyq avıatsııasy shuǵyl shaqyrýlarǵa barady. 27 qańtarda tańerteń, 103 pýltine Baıanaýyl aýdanynan qońyraý kelip tústi. Sanavıatsııa brıgadasy shuǵyl túrde aýdandyq aýrýhanaǵa kelip, kishkentaı patsıentti oblystyq balalar aýrýhanasyna aparýǵa daıyndaýda», -deıdi jedel járdem qyzmetiniń ókilderi.
Ótken demalys kúnderi Pavlodar oblysynda telefon arqyly keńes bere otyryp áıeldi bosandyryp aldy. 103 qyzmetine 32 jasar júkti áıeldiń jıi tolǵata bastaǵandyǵy jóninde qońyraý kelip túsken. Jedel járdem brıgadasy oǵan jetkenshe, dıspetcher patsıenttiń jubaıyna dárigerler kelgenge deıin ne isteý kerektigin aıtqan.
«Medıtsınalyq qyzmetkerler shaqyrtý kelip túskennen keıin bes mınýttan soń oqıǵa ornynda bolǵan. Jańa týǵan sábı men onyń anasyn № 1 qalalyq aýrýhanaǵa jetkizdi, qazir olardyń jaǵdaıy jaqsy», - dedi jedel járdem qyzmetkerleri.
Baıanaýyl aýdany Maıqaıyń kentinde taǵy bir ıahaıaǵy aýyr kelinshek úıde bosandy. Jedel járdem brıgadasy 29 jasar áıeldiń úıine kelip, bosandyryp alǵan. Jańa týǵan nárestege alǵashqy kómek kórsetildi, sodan keıin anasymen birge kenttiń statsıonaryna jetkizildi.
«Búgingi tańda vırýstyq ınfektsııalardyń taralýyna baılanysty 103 qyzmetine táýligine 1 myńnan astam qońyraý kelip túsýde, bul ádettegi kúnderge qaraǵanda 30-40 paıyzǵa kóp», - deıdi dárigerler.
Avtory Anton Gagarın
