Pavlodarda dárigerler qulatyp alǵan bir jasar balanyń qabyrǵasy synǵan

PAVLODAR. QazAqparat – Pavlodarda balany jaraqattaý faktisi boıynsha jedel járdem brıgadasyna qatysty qyzmettik tergeý bastaldy, dep habarlaıdy QazAqparat tilshisi.

«Sáýirdiń 6-sy kúni saǵat 21:03-te jedel járdem shaqyra bastadym, sebebi qurysý belgilerinen keıin balamnyń júregi toqtap qaldy. 5 mınýttan keıin ǵana qońyraýdy aldy. Mundaı jaǵdaıdy eskeretin bolsaq, bul – óte uzaq», - dep jazdy pavlodarlyq áıel jantúrshigerlik oqıǵa týraly tipavlo.dar Instagram paraqshasynda.

Onyń aıtýynsha, dárigerler tez jetken. Biraq qandaı naýqasqa kele jatqanyn bile tura, jınalmaı kelgen.

«Ottegi bolmady, budan keıin shuǵyl kómek kórsetý úshin qalǵan quraldardy alýǵa qaıtadan úsh ret tómen tústi. Qanshama ýaqytty beker joǵaltyp aldy», dedi ol.

Áıeldiń aıtýynsha, alǵashqy kómek kórsetý kezinde balanyń qabyrǵasyn syndyryp alǵan.

«Bul eshteńe emes, aýrýhanaǵa bara jatqanda balany basymen qulatyp alǵan. Qazir balam aýyr halde aýrýhanada jatyr», - dep habarlady náresteniń anasy.

Densaýlyq saqtaý basqarmasynyń málimetinshe, 2021 jyly týǵan bala oblystyq balalar aýrýhanasynyń jansaqtaý bóliminde jatyr.

«Jaǵdaıy turaqty aýyr. Dıagnozy - eki jaqty polısegmentaldy pnevmonııa. Sonymen qatar, tserebraldy sal aýrýy, psıhomotorlyq damýdyń keshigýi, sımptomatıkalyq epılepsııa bar. Sondaı-aq, segizinshi qabyrǵasy synǵan. Atalǵan fakt boıynsha qyzmettik tergeý júrip jatyr», dep habarlady oblystyq densaýlyq saqtaý basqarmasy.