Pavlodarda dári-dármekterdi áleýmettik jeliler men dúkende satqan turǵyndar anyqtaldy
PAVLODAR. QazAqparat - Polıtseıler dári-dármekterdi zańsyz satýdyń 8 faktisin anyqtady, dep habarlaıdy pavlodarnews.kz.
Dári-dármekterdi zańsyz satýdy anyqtaý maqsatynda polıtsııa qyzmetkerleri turaqty negizde áleýmettik jelilerge monıtorıng júrgizedi.
- Monıtorıng júrgizý kezinde áleýmettik jelilerdegi paraqshalardyń birinde zańsyz kásipkerlik qyzmet faktisi anyqtaldy, - dedi oblystyq polıtsııa departamentinde. - Polıtsııa qyzmetkerlerimen júrgizilgen jedel-izdestirý is-sharalary barysynda Pavlodar qalasynyń 23 jastaǵy turǵyny anyqtalyp, ustaldy. Zań buzýshy turǵynnan 25 ampýla novokaın, 25 ampýla «tsef 3», 11 qaptama «zıtmaks» 1 dana (tabletka) levozın jáne 15 ampýla lıdokoın tárkilendi. Osy fakti boıynsha eldiń zańnamasyna sáıkes quqyqtyq baǵa beriletin bolady.
Basqa jaǵdaıda Pavlodar aýdany aýyldarynyń birinde altynshy shildede saǵat 18.00-de reıdtik is-sharalar júrgizý kezinde Pavlodar aýdanynyń krımınaldyq polıtsııa bólimi men jergilikti polıtsııa qyzmeti qyzmetkerlerimen dúkende dári-dármekterdi satý faktisi anyqtalǵan.
- 42 jastaǵy aýyl turǵyny azyq-túlikten basqa, osy qyzmetke lıtsenzııasy joq dárilik preparattardy da ótkizgen, - dedi departamentte. - QR ÁQBK 424-baby 1-bólimi boıynsha (zańsyz medıtsınalyq nemese farmatsevtıkalyq qyzmet) dúkenniń ıesin ákimshilik jaýapkershilikke tartý úshin materıal jınalyp, densaýlyq saqtaý organdaryna jiberildi. Alynǵan dárilik preparattar patsıentterdi emdeýde odan ári paıdalaný maqsatynda tıisti organdarǵa beriletin bolady.
