Pavlodarda dán sebýge ońtaıly kezeń 5 mamyrdan bastalady – agroǵylym

PAVLODAR. KAZINFORM - «Pavlodar tájirıbelik aýyl sharýashylyǵy stansasy» JShS aýdandar bólinisinde egis naýqanynyń merzimin belgiledi.

Óńirlik aýyl sharýashylyǵy basqarmasynyń basshysy Darhan Doşanovtyń aqparynsha, bıyl aımaqta 1 665,6 myń gektarǵa tuqym sebiledi jáne bul ótken jylmen salystyrǵanda 101,3 myń gektarǵa artyq. 

- Egis alqaptaryn daıyndaý boıynsha barlyq agrotehnıkalyq jumystar ýaqtyly isteldi, 179 myń gektar býmen óńdelip, 235 myń gektar jer jyrtyldy. Bıyl egis alqaptarynyń qurylymyn ártaraptandyrý maıly daqyldar alqaptaryn 25,9 myń gektarǵa jáne qaraqumyq daqyldaryn 5,3 myń gektarǵa ulǵaıtýǵa baǵyttalǵan. Sondaı-aq, turaqty jem-shóp bazasyn qurý jumystary júrgizilip jatyr. Atalǵan daqyldar boıynsha alqaptar 46,5 myń gektarǵa ulǵaıtylyp, 292 myń deıin deıin jetkiziledi. 164,5 myń tonna tuqym saqtalǵan, jospar boıynsha 100%, - dep habarlady basqarma basshysy.

Dıqandar men agrokeshen ǵalymdary ylǵal qorynyń kólemin, egis aldyndaǵy topyraqty óńdeýdi, tuqym sebý strategııasy men tásilderin qarastyryp jatyr.
«Pavlodar tájirıbelik aýyl sharýashylyǵy stansasy» JShS-nyń mamandary oblys aýdandary bólinisinde egis naýqanyn júrgizý, ıaǵnı dán sebýdi 5 mamyrdan 3 maýsymǵa deıingi aralyqty júrgizýdi usynyp otyr.

Eske sala keteıik, Pavlodar oblysynda egin sharýashylyǵyna bólingen sýbsıdııanyń jartysyn iri sharýashylyqtar ıelenip otyr.  Egin salýmen 1 385 sharýashylyq aınalyssa, onyń 48-i ǵana iri sharýashylyq (jalpy sannan 3,5 paıyz) bolyp esepteledi. Byltyr óńirge berilgen 9,4 mlrd teńgeniń 4,7 mlrd teńgeden astamyn solar alǵan. Qalǵan bóligin 1 337 fermer qanaǵat etken.