Pavlodarda «Dala sulýlary» kórmesi ashyldy
PAVLODAR. QazAqparat - Oblystyq kórkemsýret mýzeıinde ashylǵan jergilikti sýretshi Altyn Qısamıdenovanyń kórmesinde 70-ke jýyq syzba jáne keskindeme týyndysy usynyldy, dep habarlaıdy pavlodarnews.kz.
Sýretshiniń «Dala sulýlary» áıelder portretter serııasy tańǵajaıyp pen kórkemdikke toly. Áıel beınesin aq qaǵazǵa túsirýden shabyt alatyn qylqalam sheberi qazaq qyz-kelinshekteri men analaryna tán erekshelikti, qansha ýaqyt ótse de áıel otbasy tiregi men oshaq ıesi bolyp qala beretindigin sýret arqyly kórsetýge tyrysady.
«Pastelde jumys isteý kez kelgen sýretshiniń qolynan kele bermeıdi. Al, bul jerde Altyn Qısamıdenovanyń osy ádispen oryndalǵan erekshe jumystary qoıylǵan. Bular- 2011, 2017, 2018 jyldar aralyǵynda salynǵan týyndylar», - deıdi ekskýrsııa júrgizýshi Baqytgúl Ádilbek. 
Onyń aıtýynsha, kórmege usynylǵan shyǵarmalar Ystyqkól, Almaty, Astana jáne Pavlodar qalasynda oryndalǵan peızajdar serııasyn quraıdy. Keń jazıra dalanyń ásem kórinisin, syr-sıpatyn berý arqyly elimizdiń tabıǵatyn súıispenshilikpen beıneleıdi. Qaıtalanbas sulýlyqty beıneleýde qasıetti atameken topyraǵynyń jylýlyǵyn kórkemsýret óneri arqyly jetkizedi.
Altyn Qısamıdenova 1962 jyly Pavlodar oblysy Lenın kentinde dúnıege kelgen. 1987 jyly N.K. Krýpskaıa atyndaǵy Semeı pedagogıkalyq ınstıtýty kórkem-syzba fakýltetiniń «Beıneleý óneri, syzý jáne eńbek pániniń muǵalimi» mamandyǵy boıynsha bilim alǵan. 2005 jyldan Pavlodar kórkemsýret kolledjiniń kásibı pánder oqytýshysy. Portret, peızaj, natıýrmort, taqyryptyq janrynda jumys jasaıdy. Respýblıkalyq, oblystyq, qalalyq shyǵarmashylyq kórmeler, konkýrstar jáne jyl saıyn ótkiziletin plenerlerdiń belsendi qatysýshysy.
Aıta ketken jón, kórme 30 jeltoqsanǵa deıin jumys isteıdi.
