Pavlodarda dala órtiniń týyndaýyna kináli azamat jazaǵa tartyldy

PAVLODAR. KAZINFORM — Pavlodar oblysynda órt sóndirýshiler dala órtin jedel túrde joıyp, tilsiz jaýdyń orman alqabyna taralýyna jol bermedi.

Sharbaqty aýdany Aleksandrovka aýyldyq okrýginiń aýmaǵynda qurǵap turǵan dala shóbi órtengen. Shuǵyl qyzmetterdiń jedel is-qımyldary men barlyq tartylǵan qurylymdardyń ózara úılesimdi is-qımylynyń arqasynda órttiń orman alqaby men turǵyn úılerge ótýine jol berilmedi.

— Dalaly jerde órt shyǵyp, ystyqqa jáne jeldi aýa raıyna baılanysty jalynnyń aıtarlyqtaı aýmaqqa taralý qaýpi týyndady. Oqıǵa ornyna Pavlodar oblysynyń tótenshe jaǵdaılar departamentiniń bólimsheleri, jergilikti atqarýshy organdardyń órt sóndirý beketteriniń qyzmetkerleri, orman qorǵaý ókilderi jiberildi, sondaı-aq «Qazavıaormanqorǵaý» RMQK avıatsııa kezekshisiniń ushýy júzege asyryldy.

Qysqa merzimde 100 sharshy metr jerge taralǵan órt oqshaýlanyp, joıyldy. Órt sóndirýshilerdiń, jergilikti atqarýshy organdardyń jáne «Ertis ormany» rezervaty mamandarynyń jedel qımylynyń arqasynda tilsiz jaý orman alqabyna jetpeı toqtatyldy jáne jaqyn mańdaǵy eldi mekenderge tóngen qaýip joıyldy. Oqıǵaǵa qurǵaq shópti jaǵý kezinde órt qaýipsizdigi erejeleriniń buzylýy sebep bolǵan. Kináli adam anyqtalyp, ákimshilik jaýapkershilikke tartyldy. 15 aılyq eseptik kórsetkish mólsherinde aıyppul taǵaıyndaldy, — dep habarlady óńirlik tótenshe jaǵdaılar departamentiniń baspasóz qyzmetinen.

Tótenshe jaǵdaılar qyzmetiniń mamandary ystyq aýa raıy jáne órt qaýpi joǵary jaǵdaılarda otqa abaısyzdyq tanytý qaıǵyly saldarǵa soqtyrýy múmkin ekenin eskertip otyr. Órt qaýipsizdigi erejelerin saqtaý — árbir azamattyń mindeti.

Eske sala keteıik bıylǵy maýsym aıynan «Ertis ormanynda» órt qaýiptiliginiń tótenshe deńgeıi jarııalanǵan edi.