Pavlodarda burynǵy mekteptiń ǵımaraty bir bólke nannyń qunyna satylyp ketti
PAVLODAR. KAZINFORM — Aqsý qalasyna qarasty Dostyq aýyldyq okrýginiń ákimdigi bos turǵan mektep ǵımaratyn aýktsıonǵa shyǵaryp, 213 teńgege satyp jibergen. Máseleniń mán-jaıyn Kazinform tilshisi anyqtap kórdi.
Buryn bastaýysh mektep bolǵan ǵımarat Aqsý qalasyna qarasty Dostyq aýyldyq okrýgi, Bereke aýylynyń bólimshesinde ornalasqan. Nysan 1993 jyly salynǵan. Elektrondyq saýda alańynda ǵımarattyń aýmaǵy 92 sharshy metr dep kórsetilse, tıesili jerdiń kólemi 1 gektarǵa jýyq. 2023 jyly nysannyń quny 561 myń teńgege baǵalanǵan.
Elektrondyq saýda alańynda satý týraly habarlama bıylǵy 8 aqpanda jarııalanǵanyn kórýge bolady. Іrgetasy betonnan, syrtqy qabyrǵalary penobloktan jasalyp, tóbesi shıfrlanǵan, edenine taqtaı tóselgeni jazylǵan. Nysan osy ýaqytqa deıin Dostyq aýyldyq okrýgi ákiminiń balansynda ustalyp kelgen.
Anyqtaǵanymyzdaı bul bastaýysh mektep 20 jylǵa jýyq ýaqyt jumys istep turǵan. Pavlodar oblysynyń bilim berý salasyndaǵy sapany qamtamasyz etý departamenti 2013 jyly nysannyń talapqa saı emes ekenin alǵa tartyp, japqyzyp tastaǵan.
— Bereke aýylyna qaraıtyn, shartty ataýy «Malaıa Paramonovka» dep atalatyn bólimshedegi bastaýysh mektep 2013-2014 jylǵy oqý jylynda jabyldy. Bilim berý salasyndaǵy sapany qamtamasyz etý departamenti sol jyly Aqsý qalasyna qaraıtyn aýyldyq aımaqtar boıynsha álgindeı 8 bastaýysh mekteptiń jumysyn toqtatty. Negizgi sebep — bul oqý ǵımarattarynda sport zaly, ashana, májilis zaldary bolmady. ıAǵnı balalardyń tolyqqandy bilim alýyna jaǵdaı jasalmaǵan. Sol jyldan bastap «Malaıa Paramonovkadaǵy» balalardy Berekedegi orta mektepte tasyp oqyta bastadyq, bul úrdis áli kúnge jalǵasýda. Al ǵımarattyń ózi sol ýaqyttan aýyl ákimdiginiń balansyna berilgen. Ekinshi turǵydan, atalǵan bastaýysh mektepte oqıtyn balalardyń sany turaqsyz edi. Qystyń kúni alys fermalarda mal ustaıtyn otbasylardyń balalary kelmeıdi, al kúz ben jazǵyturym olardyń sany kóbeıetin. Qazirgi kúnniń ózinde shamamen 4-5 oqýshy ǵana Bereke aýylyndaǵy orta mektepke avtobýspen qatynap oqıdy, - dep túsindirdi Aqsý qalalyq bilim berý bóliminiń basshysy Qaırat Smaǵulov.
Osylaısha salynǵanyna 30 jyldan asa ýaqyt ótken burynǵy eski bastaýysh mektep ǵımaratyn Bereke aýylynyń ákimdigi bıyl aýktsıonǵa shyǵarǵan. Bastapqy baǵa 1 mln 683 myń teńge bolǵanymen, básekelestik bolmaǵandyqtan nysan nebári 213 teńgege ótip ketken. Jańa ıesi ony qazirdiń ózinde satýǵa nıet etip otyrǵan kórinedi. Nysandy satý týraly jarnama habarlandyrý saıttarynda jarııalanyp, keıin alynyp tastalǵan.
Ókinishke qaraı, atalǵan aýktsıonǵa qatysty Aqý qalalyq ákimdiginen aqparat ala almadyq.
Buǵan deıin prokýratýra tekserisinen keıin Aqsýda páter jaldaý aqysy arzandaǵany týraly jazǵanbyz.