Pavlodarda býkmekerlik keńseni tonaǵan ury Atbasarda ustaldy
ASTANA. QazAqparat - Pavlodarda býkmekerlik keńseni tonap ketip, polıtsııadan qashyp júrgen jigit Atbasar stansasynan ustaldy. Oblystyq ІІD budan buryn tonaýǵa qatysty eki adamnyń birden ustalǵanyn habarlaǵan bolatyn, dep habarlaıdy «QazAqparat» HAA tilshisi.
Eske sala ketsek, qylmys qarashanyń 14-nen 15-ne qaraǵan túni tirkelgen.
«Pavlodar qalasynda belgisiz bireýler Krıvenko kóshesindegi býkmekerlik keńsege basa kóktep kirip, pyshaqpen qorqytyp, kúzetshiniń uıaly telefony men keńsege tıesili aqshany qoldy etken. Jedel izdestirý sharalary barysynda quqyq qorǵaýshylar 26 jastaǵy eki jas jigitti qolǵa túsirdi. Úshinshi kúdikti 1987 jylǵy Evgenıı Doronın qashyp júr», - dep habarlaǵan edi Pavlodar oblystyq ІІD-niń baspasóz qyzmetinen.
Polıtsııaǵa kúdiktiniń Qostanaıǵa oblysyna aparatyn poıyzǵa otyrǵany týraly aqparat túsken. Qostanaıǵa aparatyn barlyq baǵyttaǵy stantsııalarǵa kúdiktiniń sýreti ilinip, izdestirý jumysyna Aqmola oblysynyń quqyq qorǵaýshylary da atsalysqan.
«Aqmola oblysynyń tártip saqshylary kúdiktini Atbasar stansasynan ustady. Ol Pavlodar qalasyna jetkizildi. Úsh kúdikti de qazir qamaýda. Olarǵa QR QK-niń 192-baby 3-bóligi boıynsha aıyp taǵylyp otyr», - dep habarlaıdy Pavlodar oblystyq ІІD baspasóz qyzmeti.
