Pavlodarda búginnen bastap jol jóndeý jumystary qolǵa alynady
PAVLODAR. QazAqparat - Búgin Pavlodarda aǵymdaǵy jol jóndeý jumysy bastalady, dep habarlaıdy QazAqparat.
Pavlodar ákimdigi taratqan málimetke sensek, ótken jyldary kún jylynǵanǵa deıin shuńqyrlardy jóndeý eki kezeńde júrgizilip kelgen.
Qystyń sońynda shuńqyrlarǵa qıyrshyq tas tóseldi, al aýa temperatýrasy jylynyp, asfalt-beton zaýyttary iske qosylǵannan keıin shuńqyrlarǵa qarapaıym asfalt tóseletin.
Bıyl qala kóshelerinde alǵash ret polımerlik sýyq asfalt tóseýdiń jańa tehnologııasy – MAC asfalt (Multigrade asphalt cement) qoldanylady.
Ony aýa temperatýrasy salqyn ýaqytta qoldanýǵa bolady.
«Sýyq polımerli asfalt» tóselgennen keıin birden avtokólik quraldary júre alady, tehnologııa qospanyń kebýi úshin qosymsha ýaqytty qajet etpeıdi.
Mamandar jóndeýdi qajet etetin ýchaskelerdi tekserdi.
Qazirgi ýaqytta 39 kóshe iriktep alyndy.
Onda 3.200 sharshy metrden astam aýmaqta asfalt tóseminiń búlingen jerleri qalpyna keltiriledi.
