Pavlodarda birneshe dúken kúrish baǵasyn ósirip satqan

PAVLODAR. KAZINFORM - Tekserý barysynda saýda núkteleri atalǵan ónimge ústeme baǵany 18,9 %-dan  53,6 %-ǵa deıin asyryp jibergeni anyqtalǵan.

Pavlodar oblysy boıynsha saýda jáne tutynýshylardyń quqyqtaryn qorǵaý departamenti saýda salasynda 212 jospardan tys tekserý júrgizip, onyń ishinde 168 zań buzýshylyqty tirkegen.

- Áleýmettik mańyzy bar azyq-túlik taýarlary boıynsha 5 dúkendi jospardan tys tekserý kezinde kúrishke ústeme baǵa tym kóp qosylyp satylyp jatqany anyqtaldy. Mysal úshin kásipker atalǵan ónimniń bir kelisin saýda núktesinen 410 teńge alyp, ony 630 teńgeden satqan. Saýda ústemesi 50 %-dan asyp ketken. Al qoldanystaǵy zań 15%-ǵa deıin ústeme qosýǵa ruqsat beredi. Nátıjesinde saýda núkteleriniń ıelerine aıyppul salyndy, - dep habarlady departamentten.

Departament ókilderi sondaı-aq taǵy eki dúkende qaraqumyq pen jumyrtqany da qymbatqa satqanyn anyqtaǵan. Al bir kásipker sórege ónimniń baǵasyn jazyp qoımaǵany úshin jaýapqa tartylǵan.

2025 jylǵy 13 naýryzdan bastap QR Ákimshilik quqyq buzýshylyq týraly kodekstiń 204-4-babyna ózgerister engizilip, oǵan sáıkes áleýmettik mańyzy bar taýarlarǵa shekti ústeme baǵany asyryp qoıǵandarǵa jaýapkershilik kúsheıtilgen Mundaı jaǵdaıda jeke tulǵalarǵa, shaǵyn kásipkerlik sýbektilerine 5, orta kásipkerlik sýbektilerine 35, iri kásipkerlik sýbektilerine 150 AEK mólsherinde aıyppul kózdelgen. Al zań buzýshylyqtar qaıtalanǵan jaǵdaıda aıyppul mólsheri 300 AEK-ke deıin jetýi múmkin.

Buǵan deıin taýardyń jarnamadaǵy baǵasy men dúkendegi baǵasy arasynda aıyrmashylyq bolsa, ne isteý kerek ekenin jazǵanbyz.