Pavlodarda birlestik tóraǵasy turǵyndardyń 2,5 mln teńgege jýyq aqshasyn jumsap jibergen
PAVLODAR. KAZINFORM — Pavlodarda kópqabatty úıdiń ortaq qarajatyn jeke qajetine jaratqan múlik ıeleri birlestiginiń (MIB) tóraǵasy qylmystyq jaýapkershilikten bosatyldy. Ol turǵyndarǵa keltirilgen shyǵyndy tolyq ótegen.
Pavlodardaǵy Lomov kóshesinde ornalasqan kópqabatty úıdiń turǵyndary 2023 jyldyń sońynda 42 jastaǵy er adamdy MIB tóraǵasy etip saılaǵan. Osylaısha, oǵan úıdiń ortaq sharýasyn basqarý jáne turǵyndar jınaǵan qarajatqa ıelik etý senip tapsyrylǵan.
Alaıda 2024 jyldyń maýsymynan bastap er adam ortaq esepshottaǵy aqshany jeke qajetine jumsaı bastaǵan. Atap aıtqanda, qarajatty dámhana, ashana, kondıterlik dúkenderde, dárihanalarda jáne azyq-túlik dúkenderinde saýda jasaýǵa paıdalanǵan, biraq jumsaǵan aqshasyn keri qaıtarmaǵan.
Bir jyldan keıin ortaq esepshottaǵy qarajattyń jetispeıtini anyqtalyp, polıtsııa qarajatty ıemdený deregi boıynsha qylmystyq is qozǵaǵan. Bank derekteri arqyly aqshanyń qaıda jumsalǵany anyqtalǵan.
Іs Pavlodar qalasynyń qylmystyq ister jónindegi aýdanaralyq sotynda qaraldy. Alaıda sot otyrysynda jábirlenýshi taraptyń ókili sottalýshymen tatýlasýyna baılanysty isti toqtatýdy suraǵan. Keltirilgen shyǵyn tolyq ótelip, MIB ókilderiniń oǵan qatysty talaptary bolmaǵan.
Sot qaýlysymen er adam qylmystyq jaýapkershilikten bosatyldy.
Eske sala keteıik, Pavlodarda túrmeniń burynǵy qyzmetkerine para alǵany úshin 11,5 mln teńge aıyppul salyndy.
