Pavlodarda brakonerlerden 200 keliden astam balyq tárkilendi

PAVLODAR. QazAqparat - Reıd barysynda «Lenın - Rýsskaıa Polıana» avtojolynda polıtsııa qyzmetkerleri «Nıssan» markaly avtokólikti ustady, dep habarlaıdy QazAqparat.

Polıtsııa departamentiniń baspasóz qyzmeti málim etkendeı , kóliktiń salonynda júrgizýshiden basqa taǵy eki jolaýshy bolǵan.

Tekserý kezinde avtokólikten balyq aýlaýǵa tyıym salynǵan qytaı óndirisiniń monotorlary, sondaı-aq jalpy salmaǵy shamamen 25 kg bolatyn balyq salynǵan sómkeler tabyldy.

Er adamdar Ertis ózeniniń «Tentek» arnasynan balyq aýlaýdan kele jatqanyn túsindirdi.

«Atalǵan fakti boıynsha balyq aýlaý jáne balyq resýrstary men basqa da sý janýarlaryn qorǵaý erejelerin buzǵany úshin QR ÁQBtK 383-baby 3-bóligi boıynsha árbir balyqshyǵa qatysty ákimshilik óndiris qozǵaldy», - dep habarlady Pavlodar oblysy polıtsııa departamentiniń baspasóz qyzmeti.

Sondaı-aq, balyq aýlaý quraldary - monotor, qaıyq, neılon tory jáne aýlanǵan balyqtary zattaı dálel retinde alyndy.

Osyǵan uqsas faktini «Lenın-Kýrchatov» avtojolynda Aqsý qalasynyń patrýl polıtsııasy vzvodynyń qyzmetkerleri anyqtady.

Munda balyq aýlaý erejesin buzǵany úshin qalanyń eki turǵyny ustaldy.

Zattaı dálel retinde olardan rezeńke qaıyq, monotor jáne salmaǵy 188 kg bolatyn aýlanǵan balyq tárkilendi.

Atalǵan faktiler boıynsha materıaldar sotqa joldandy.