Pavlodarda «Bozdaqtar» kitabynyń besinshi tomy jaryqqa shyqty

ASTANA. QazAqparat - Pavlodarda Dostyq úıinde 1387 pavlodarlyq maıdanger týraly málimet engizilgen «Bozdaqtar» kitabynyń besinshi tomynyń tusaýy kesildi, dep habarlaıdy pavlodarnews.kz.

Estelikter týraly eńbek - 1995, 1997, 2014 jáne 2015 jyldary shyqqan basylymdardyń jalǵasy. Munda maıdanda qaza tapqan, habarsyz ketken jáne tutqynda bolǵan 1387 pavlodarlyq týraly bıografııalyq málimet jınaqtalǵan.

Surapyl soǵys alańynda 556 jaýynger qaıtys bolsa, 549 habarsyz ketken jáne túrli aýrýlar men jaraqattan 103 adam kóz jumǵan. Sonymen qatar qurastyrýshylar nemis jáne fın tutqynynda qaza tapqan 22 pavlodarlyqty qosqan. Basylymda oblys boıynsha iz-túzsiz ketken 128 ofıtser men 1259 qatardaǵy jaýynger týraly aqparat oryn alǵan.

«Aqtoǵaı aýdanynda Qojamjar aýyly bar», - deıdi «Qazaqstan elektrolız zaýyty» AQ-nyń vıtse-prezıdenti, «Maıdan joly» izdeý jasaǵynyń jetekshisi Jumabek Qamzın.

Onyń sózinshe, 50 jyl buryn paıda bolǵan eskertkishte ómirden ótken 200 jaýyngerdiń esimi qashalyp jazylǵan. Tórtinshi jáne besinshi tomnyń arqasynda jańa eskertkish salyp, 106 habarsyz ketken jerlesimizdiń esimderin jazdyq. Oblystyq mádenıet, muraǵattar jáne qujattama basqarmasynda habarlaǵandaı, jańa tomǵa vedomstvo mamandary men muraǵatshylardyń Reseı Federatsııasy Qorǵanys mınıstrligi ortalyq muraǵaty, Belarýs Respýblıkasy ulttyq muraǵaty jáne Fındlıandııa Ulttyq muraǵatyna jasaǵan ekspedıtsııasy barysynda tapqan derekter arqaý bolǵan.

Sonymen qatar qazaqstandyqtardyń «Birlik» Harkov ulttyq qoǵamdyq birlestigi, «Pamıat» - «Eskertkish» Shyǵys Prýssııasynda qaza tapqan keńes jaýyngerleri qory kommertsııalyq emes uıymy, Eskertkish kitaby materıaldary, Reseı, Qazaqstan jáne Pavlodar oblysy izdeý jasaqtary usynǵan qujattar paıdalanylǵan.