Pavlodarda boranda adasyp ketken eki muǵalim men oqýshy tabyldy
ASTANA. QazAqparat - Pavlodar oblysynyń Aqtoǵaı aýdany Jalaýly aýylynda qatty boran kezinde mektepten shyqqan eki muǵalim men 4-synyp oqýshysy adasyp ketken, dep habarlaıdy pavlodarnews.kz.
Aqtoǵaı aýdany ákiminiń mindetin atqarýshy Ermek Mashryqovtyń aıtýynsha, 11-qańtarda soqqan qatty boranda kezinde Jalaýly aýyly mektebiniń bastaýysh synyp muǵalimderi men 4-synyp oqýshysy bilim ordasynan shyǵyp, aýyl ishinde adasyp ketken.
«Buryn «úıden shyǵyp adasyp ketti» degende senbeıtin edik, endi mine, keshe kózimiz jetti. Aınala aq tútikke oranyp, túk kórinbeı ketti. Jalaýly aýylynyń ákimi Azamat Medetovpen birge arnaıy top qurylyp, adasqandardy eki saǵattyń ishinde aman-esen taptyq. Bala da, ustazdar da din aman», - deıdi Ermek Mashryqov.
Aıta keteıik, keshe Aqtoǵaı aýdanynyń tas joldarynda qar qursaýynda 81 adamy bar 23 kólik qalǵan.
«Tótenshe jaǵdaılar bóliminiń 17 tehnıkasy boran kezinde 18 kólikti alyp shyqty. Jolaýshylar Áýelbek, Jańabet, Mútkenov, Aqtoǵaı aýyldarynyń jylytý pýnkterine jetkizildi. Zardap shekkender joq. Jolda qarǵa batyp qalǵan bes aýyr tehnıka keıin shyǵarylady», - dedi Ermek Mashryqov.
