Pavlodarda bolashaq metallýrgterdiń jańa jataqhanasy ashyldy
PAVLODAR. QazAqparat - Pavlodarda tústi metallýrgııa kolledjiniń stýdentterine arnalǵan 200 oryndyq bes qabatty jataqhana ashyldy, dep habarlaıdy pavlodarnews.kz.
Jańa stýdentter úıi oqý ordasynyń aýmaǵynda boı kóterdi. Jataqhana memlekettik jeke menshik seriktestik aıasynda ERG Eýrazııalyq tobynyń demeýshilik qarjysyna salyndy. Joba quny - 680 mln teńge.
Ár bólme eki adamǵa shaqtalǵan, ortaq ájethanasy men jýyný bólmesi bar. Osy aptada Wi-Fi qosylady. Budan bólek, kir jýatyn oryn, býfet, jattyǵý men horegorafııa zaly bar.
Aıta keteıik, munda qonystanatyn stýdentterdiń 27%-y - qyzdar.
«198 adam jataqhanada turýǵa ótinish bildirdi, sonymen qatar bizde múmkindigi shekteýli adamdar úshin de bólmeler bar, - deıdi tústi medallýrgııa koledjiniń dırektory Aleksandr Boldashevskıı. - Ázirge basqa qalalardyń stýdentteri bizde joq. Biraq, ózge óńirlerden kelgen jastardyń ata-analary keler bolsa qajetke jaraıdy degen oıdamyn.Biz barlyǵy úıdegideı bolý úshin jaǵdaı jasadyq».
Qurylys jumystary bir jyl jalǵasty. Kolledj aımaǵynda fýtbol men basketbol alańy salyndy. Pavlodar oblysy ákiminiń orynbasary Meıram Begentaev stýdentterdi quttyqtap, bólme kiltterin saltanatty túrde tabystady.
«Menińshe, sizderdiń bilimderińiz ben eńbekterińizdiń arqasynda óńirimiz ilgeri damyp, barlyq shyǵynnyń orny tolady. Ustazdardyń sizderge berip jatqan bilimi sizderdiń jumystaryńyzda kórinis tabady degen senimdemin», - dedi Meıram Begentaev.
Jańa úıde stýdentter tegin turady. Jalpy, kolledjde 589 adam bilim alýda.
