Pavlodarda blokposta qalaǵa kirmek bolǵan kólikten qarý tabyldy
PAVLODAR. QazAqparat – Pavlodardyń aınalasynda blokpostar jumys istep tur, dep habarlaıdy QazAqparat Habar 24 arnasyna silteme jasap.
Olardyń jumysyn júıelendirý úshin jedel áreket etý ortalyǵy qurylǵan. Tártip saqshylary qalaǵa kirip-shyǵatyndardy túgel tekserip, sodan keıin ǵana ótkizedi.
Máselen sondaı bir tekserý kezinde Kenjekól aýyly mańyndaǵy blokposta toqtatylǵan kólik ishinen qarý tabyldy. Jedel tergeý toby ony tárkilep, tekseris bastaldy.
«Óńirde tótenshe jaǵdaı rejıminiń engizilýine baılanysty Pavlodar qalasy aýmaǵynda blokpostar qoıyldy. Biz qazir qalaǵa kirip jatqan búkil kólikti tekserip jatyrmyz. Ondaǵy maqsat – qarý-jaraq, esirtki syndy qaýipti zattardy tasymaldap jatqan adamdardy anyqtaý», - deıdi qalalyq patrýl polıtsııasynyń ınspektory Qazbek Syzdyqov.
