Pavlodarda bıznes qaýymdastyǵyn tolǵandyrǵan máseleler talqylandy - Úkimet
ASTANA. QazAqparat - QR Premer-Mınıstri Baqytjan Saǵyntaev «Atameken» UKP-nyń Pavlodardaǵy óńirlik keńesiniń múshelerimen kezdesý barysynda bıznes ortany damytý men shaǵyn jáne orta bıznes ókilderiniń ekonomıkany jańǵyrtý jumystaryna qatysý máselelerin talqylady, dep habarlady primeminister.kz.
Kezdesýdiń negizgi taqyryptary qarjylyq jáne zańnamalyq sıpattaǵy memlekettik qoldaý sharalary men bıznes ortany odan ári jaqsartý máseleleri boldy. Áńgime tekserister men talaptardyń sanyn azaıtý jáne ruqsat pen anyqtamalar berý úderisterin ońtaılandyrý jóninde órbidi.
Ónerkásiptik óńir úshin ózekti máselelerdiń biri - kásiporyndardyń tehnologııalyq jańǵyrýy bolyp tabylady. Jańǵyrtý aıasynda óndiris úderisterin tsıfrlandyrý men avtomattandyrý, eńbek resýrstaryn ónerkásiptik sektordan bosatý sharalary júzege asyrylady.
Osyǵan oraı, ónimdi jumyspen qamtý jáne jappaı kásipkerlikti damytý baǵdarlamasyn iske asyrý aıasynda bıznes qaýymdastyq pen jergilikti atqarýshy organdar jańa jumys oryndaryn ashý, jumystan bosatylǵan mamandardy qaıta oqytý ári qaıta daıarlaý sharalaryn qolǵa alýy kerek. Bul jumystar týraly Pavlodar oblysynyń ákimi B.Baqaýov baıandady.
Óńir kásipkerleri jańa jobalarǵa «Pavlodar» AEA salyqtyq jeńildikterdiń qoljetimdiligi, «Bıznestiń jol kartasy - 2020» baǵdarlamasy boıynsha qarajattardyń qoljetimdiligi, óndirýshilerdiń biryńǵaı tizimin qalyptastyrý taqyryptaryn qozǵady.
Budan ózge, pavlodarlyq kásipkerler úshin otandyq óndirýshilerdi josyqsyz kásipkerlerden qorǵaý, bıznes sýbektilerin shaǵyn nemese iri sanatyna jatqyzý belgilerin anyqtaý máseleleri ózekti bolyp tabylady. Sondaı-aq, «Atameken» UKP óńirlik keńesiniń músheleri oqytý mekemelerin lıtsenzııalaý rásimderine jáne elektrondy shot-faktýralardy shyǵarý úderisterine qyzyǵýshylyq tanytty.
Oblys kásipkerleriniń usynystary men suraqtaryna QR Ulttyq ekonomıka mınıstri T. Súleımenov, QR Investıtsııalar jáne damý mınıstri J. Qasymbek, QR Energetıka mınıstri Q. Bozymbaev, QR Bilim jáne ǵylym vıtse-mınıstri B. Asylova túsinikteme berip ótti.
