Pavlodarda bıyl eshqashan asfalt jabyny bolmaǵan 60 jol jóndeledi
PAVLODAR. QazAqparat - Pavlodarda buryn asfaltbeton jabyny bolmaǵan kósheler jóndeledi, dep habarlaıdy pavlodarnews.kz.
Oblys ákimi baspasóz qyzmetiniń málimetinshe, bıyl jazda Pavlodarda barlyǵy 82 kóshe jóndeledi dep josparlandy, onyń 60 jolynda eshqashan asfalt jabyny bolmaǵan. Ótken jyly 17 kósheniń joly jóndelgen, onyń jeteýi qara jol bolǵan. Bıylǵy qara joldy jóndeýge 1,2 mıllıard teńge bólindi, ol byltyrǵydan 11 ese artyq (106 mıllıon teńge). Bıylǵy jazda Lesozavodtyń joldaryna túgel asfalt tóseledi dep kútilýde. Al Radıozavod, Hromzavod, MDS jáne Ekinshi Pavlodar shaǵyn aýdandarynyń kósheleri ishinara jóndeledi. Tizimde ortalyq kósheler de bar, biraq oblys ákimi olardyń ornyna shaǵyn aýdandarǵa kóńil bólý kerek dep sheshti. - Sátbaev pen Qamzın kósheleriniń jalpy uzyndyǵy boıynsha jóndeý júrgizý orynsyz. Tek jabyny nashar jerlerin ǵana jóndeý kerek, - dep atap ótken aımaq basshysy qala ákimi Qaırat Núkenovke usynys tastady. – Bosatylǵan qarjyny shaǵyn aýdandarǵa jiberińizder. Qazir jeli tósemi júrgizilip jatqan kósheler bar. Bul oraıda turǵyndarǵa barlyq baılanys jelileri salynyp bitkennen keıin jóndeý jumystary bastalatynyn túsindirý kerek. Júrgizilgen jóndeý jumystarynyń sapasyn jol zerhanasy baqylaıdy.
Aımaq basshysy mamandarǵa qysqy qoldanystan keıingi joldyń beriktigin tekserýdi tapsyrdy. Sebebi jaz ben kúzde bilinbegen barlyq aqaýlar kóktem kelisimen anyqtalady. Sonymen qatar, Ábilqaıyr Sqaqov burynǵy qurylys kolledjiniń ǵımaratyn aralady. Onyń negizinde olımpıada rezerviniń mamandandyrylǵan kolledj-ınternatyn ashý josparlanýda. Úsh korpýstyń ortaq aýdany 10 myń sharshy metrdi quraıdy. Oblys ákimi qolda bar ınfraqurylymdyq qordy qoldanýdyń basqa, tıimdi jolyn qarastyrýdy tapsyrdy. - Mundaı jerde 500-600 orynǵa arnalǵan mekeme ashýǵa bolatyn edi. Mysaly, jumys narqynda suranysy joǵary mamandardy daıyndaıtyn kópsalaly kolledj. Bapkerlerge jáne sportshylardy daıyndaýǵa memlekettik tapsyrysty bizdiń basqa oqý oryndary arasynda bólý kerek. Birneshe nusqa qarastyryp, usynys jasańyzdar, - dep tapsyrdy oblys ákimi. Al basqa áleýmettik joba Ábilqaıyr Sqaqovtyń kóńilinen shyqty. Ekinshi Pavlodarda burynǵy temir jol kolledji negizinde Balalar shyǵarmashylyq úıi ashylady. Qazirgi tańda 6 myńnan astam bala men jasóspirim turatyn shaǵynaýdanda birde-bir qosymsha bilim berý uıymy men sporttyq mekeme joq. Shyǵarmashylyq úıinde bilim berý men oıyn-saýyq, ǵylymı- tehnıkalyq, týrıstik-ólketaný úıirmeleri jáne sport sektsııalary jumys isteıdi. Atalmysh joba aıasynda 2 myńdaı bala qosymsha bilim berýmen qamtylady.