Pavlodarda bir jasar uldyń anasy joǵalyp ketti
ASTANA. QazAqparat - Pavlodarda qyzmet kórsetý salasy kolledjiniń túlegi, bir jasar uldyń anasy Aqmarjan Sadýaqasova joǵalyp ketti, dep habarlaıdy pavlodarnews.kz.
20 jastaǵy Aqmarjan Sadýaqasova 2017 jyldyń 14-shildesi kúni barlyq kıimderin jınap, úıinen shyǵyp ketken. Ákesiniń aıtýynsha, týysqandarymen jáne áke-sheshesiniń arasynda eshbir urys, kıkiljiń bolmaǵan.
«Ol azamattyq nekedegi jubaıynyń ata-anasymen turǵan. Keıin ul bala dúnıege keldi, qazir ol bir jas eki aıda. Ókinishke oraı, Aqmarjan jańa áýletpen til tabysa almaı, biz qyzymyz ben nemeremizdi óz úıimizge alyp keldik. Aqmarjan bizdiń jalǵyz qyzymyz, eki aǵasy jeke turady. Ol qujattaryn qaldyryp ketken», - deıdi ákesi.
Bala kezinde Aqmarjan jol apatyna ushyrap, dárigerler oǵan «mıynyń jaraqat alýy men zaqymdalýy» dıagnozyn qoıǵan. Uly dúnıege kelgen soń jas ana abaısyzdyqpen aıaǵyn qatty kúıdirip alǵan.
Ákesiniń sózine súıensek, shilde aıynyń basynda qyzy úıinen ketip qalyp, birneshe kúnnen soń oralǵan. Alaıda, ol kezde áleýmettik jeli arqyly jaqyndarymen habarda bolyp, barlyǵy jaqsy dep sendirgen. Úıine qaıtyp kelgen keıin eki kún ótip, qyz qaıta joǵalǵan. Týystary ony Astanada kórdik dep aıtqan.
Jas anany izdeýge «Klýb dobrıakov Pavlodara» eriktiler toby jumyldyryldy. Eriktiler Instagram paraqshalarynda anasynyń qyzyna joldaǵan úndeýin jarııalaǵan. Janary muńǵa toly ana óz qyzyn úıindegi bir jasar balasyna oralýyn ótingen. Erekshe belgileri: betinde aıqyn kórinip turǵan birneshe meń bar Boıy 165-168 sm, tolyqtaý deneli.
