Pavlodarda bilim alǵan serpindikterdiń 70% óz óńirlerine ketip qalǵan
ASTANA. QazAqparat - Pavlodar oblysynda «Máńgilik el jastary ındýstrııaǵa! Serpin-2050» baǵdarlamasy boıynsha bilim alǵan jastardyń 47-si nemese 70 paıyzy óz óńirlerine ketip qalǵan, dep habarlaıdy pavlodarnews.kz.
Bul týraly áleýmettik-mádenı máseleler jónindegi oblystyq máslıhattyń turaqty komıssııasynyń otyrysynda oblystyq bilim berý basqarmasy basshysynyń orynbasary Sáýle Alekparova aıtty.
"Atalmysh memlekettik áleýmettik baǵdarlama óńirimizde 2014 jyldan bastap júzege asyrylýda. Búgingi tańda oblystaǵy jeti kolledjde bes ońtústik aımaqtan 474 stýdent bilim alady. Stýdentter tegin baspana, shákirtaqy, qysqy jáne jazǵy kıim-keshekpen, sondaı-aq qysqy demalys kezinde úıine baryp-kelýge jolaqymen qamtamasyz etiledi", - dedi Sáýle Alekparova.
Onyń aıtýynsha, túlekterdiń alǵashqy legimen 2017 jyly 67 adam oqý ornyn aıaqtaǵan. Búgingi tańda 40 adam nemese 59,7 paıyzy jumys isteýde, úsheýi joǵary oqý ornynda bilim alýda, bireýi Otan aldyndaǵy boryshyn óteýde, toǵyzy dekrettik demalysta jáne 14-i eńbekpen qamtylmaǵan. Nátıjesinde túlekterdiń ishinen 14-i ǵana nemese 21 paıyzy Pavlodar oblysynda qalǵan. Olardyń ishinde 11 adam jumysqa ornalassa, úsheýi joǵary oqý ornynda bilim alýdy jalǵastyrýda. Beseýi Astana, Almaty, Aqtóbe qalalarynda jumys isteıdi jáne bireýi ásker qataryna jiberilgen.
" Jastardyń óz óńirlerine ketýine baspananyń joqtyǵy sebep bolyp otyr. Bıylǵy jyly 174 adam tehnıkalyq jáne kásiptik bilim berý ornyn aıaqtaıdy. Túlekterdi alyp qalý maqsatynda kolledjdiń ákimshiligi jumyspen qamtý jáne áleýmettik baǵdarlamalar basqarmasy, jastar bastamalaryn damytý ortalyǵynyń ókilderimen, kásipkerler jáne jasotandyqtarmen kezdesý ótkizýde", - deıdi Sáýle Alekparova.
