Pavlodarda bıyl 570 myń sharshy metr baspana turǵyzylady

PAVLODAR. KAZINFORM — Qurylystardyń shamamen 21 paıyzy bıýdjet qarajatyna salynyp jatyr. Ózgesi jeke qurylys kompanııalary men jeke turǵyn úı qurylystaryna tıesili.

Byltyr halyqtyń áleýmettik osal toptary úshin páterler satyp alýǵa qazynadan alǵash ret qarajat bólindi. Nátıjesinde turǵyndarǵa 808 páter satyp berildi. Oblys bıligi bul tájirıbeni bıyl da jalǵastyrmaq nıette. Ázirshe 217 páterdi satyp alýǵa jetetin qarajat qarastyrylǵan, jyl sońyna deıin bul kólem eselene túsedi dep otyr sheneýnikter.

Jalpy jyl sońyna deıin 570 myń sharshy metr baspana paıdalanýǵa beriledi degen jospar tur. Olardyń 120 myń sharshy metri — bıýdjet esebinen.

— Búgingi tańda oblysta 1765 páterlik, jalpy aýdany 118,9 myń sharshy metrdi quraıtyn 11 kópqabatty turǵyn úı salynýda. Onyń ishinde Pavlodar qalasy boıynsha — 7 úı, Ekibastuz qalasynda — 3 úı jáne Aqsý qalasynda — 1 úı. Sońǵy jyldary memlekettik baǵdarlama jáne jeke ınvestıtsııa aıasynda kóp páterli turǵyn úı keshenderiniń qurylysy qarqyn alyp, jańa yqsham aýdandar boı kóterip keledi. Máselen, 2023 jyly 3500-den astam páteri bar 42 kópqabatty turǵyn úıden turatyn «Saryarqa» shaǵyn aýdanynyń qurylysy aıaqtaldy. Atalǵan aýdannyń qurylysy aıaqtalǵanda jalpy sany 6 myńnan astam páterden turatyn 49 úı boı kóteredi, — deıdi Pavlodar oblysy qurylys basqarmasynyń basshysy Asqar Ájmurat.

Eske sala keteıik, Otbasy bank jumysshylardy baspanamen qamtýdyń úsh jolyn usyndy.