Pavlodarda bıyl 109 myńnan astam oqýshy jazǵy demalysyn tıimdi ótkize alady

PAVLODAR. KAZINFORM — Bıyl 1-10 synyptardyń 109 myńnan astam oqýshysy jazǵy demalyspen jáne jumys nysandarymen qamtylady. Bul — barlyq oqýshy sanynyń — 98,5%-y. 

Oblysta 38 myńnan astam bala demalatyn 334 mektep janyndaǵy lager, sondaı-aq, 52 myńnan astam oqýshyny qabyldaıtyn mektepter men qosymsha bilim berý mekemeleriniń bazasynda 382 beıindik lager ashý josparlanǵan.

— Áleýmettik osal sanattaǵy balalardy qoldaýǵa erekshe nazar aýdarylady. Jalpyǵa birdeı bilim berý qory esebinen 13 myńnan astam bala jáne balalar úıiniń 334 tárbıelenýshisi demalyspen qamtamasyz etiledi. Erekshe bilim berý qajettilikteri bar 200 bala úshin arnaıy lagerler uıymdastyrylady, onyń ishinde 4 lager arnaıy mektepter bazasynda qurylady. Óńirdiń bıznes-qaýymdastyǵy da úles qosyp otyr: «Joldama syıla» aktsııasy aıasynda 291 joldama satyp alyndy, sertıfıkattar Halyqaralyq balalardy qorǵaý kúni tabystalady. Sonymen qatar «Qazaqstan halqyna» qory «Jazdyq joldama — 2025» jobasy boıynsha lagerlerge 595 aýyldyq oqýshy, ıaǵnı, oqý ozattary men konkýrstardyń jeńimpazdaryn jiberedi, — dep habarlady óńirlik ákimdiktiń baspasóz qyzmetinen.

Jyl boıy jumys isteıtin 2 lager — «Jas dáýren» jáne «Baldáýren» 1 600 balany qabyldaýǵa daıyn. Taǵy 9 maýsymdyq lager 3168 oqýshyny qabyldaýǵa ázirlengen.

Nysandardyń daıyndyǵyn tekserý 25 sáýirden sanıtarlyq-epıdemıologııalyq qyzmet jáne tótenshe jaǵdaılar basqarmasy qyzmetkerleriniń qatysýymen bastaldy. Lagerlerdiń materıaldyq-tehnıkalyq bazasyn nyǵaıtýǵa oblystyq bıýdjetten 52 mln teńge bólingen

Mekteptegi eńbek jasaqtaryna, abattandyrý jáne kógaldandyrý brıgadalaryna, mektep ormanshylyqtaryna 2 200-den astam joǵary synyptyń oqýshylary tartylady.

Eske sala keteıik, elimizde 10 myńnan astam lager men 512 shatyrly kempıng ashylady.