Pavlodarda bıeniń qurǵaq súti satylýda
PAVLODAR. QazAqparat - Pavlodarda Greenwich jáne Small saýda núktelerinde bıeniń qurǵaq súti satyla bastady. Bul týraly Lebıaji aýdanyndaǵy «Altaı» ShQ-nyń basshysy Sátbek Mýkın aıtty, dep habarlaıdy pavlodarnews.kz.
- Pavlodarlyq «Fresh Milk» kompanııasymen birge óz qarjymyzǵa 730 myń eýroǵa sýblımatsııalyq apparat satyp aldyq, - deıdi Sátbek Mýkın.
- Italııada shyǵarylǵan jabdyq elektr energııasyn kóp mólsherde tutynady. Al, jeke menshik sharýashylyq aýyldan 10 shaqyrym jerde ornalasqan. Bizdiń transformatsııalyq qosalqy stantsııanyń elektrmen jabdyqtaýǵa múmkindigi jetpeıdi. Sondyqtan oblys ortalyǵyndaǵy kompanııanyń kásipornynda óńdeý jumystary júrgizilse, óndiris bazasy aýylda ornalasqan. Apparattyń qýattylyǵy 200 lıtr qymyzdy óńdeý joly arqyly 20 keli bıeniń qurǵaq sútin alýǵa múmkindik beredi».
Kásipkerdiń aıtýynsha, salmaǵy 100 gramm bıeniń qurǵaq súti 3000 teńgeden bosatylady. 100 gramy bir lıtr sýǵa qosylady. Qoldaný mólsherine shekteý qoıylmaıdy. Eki túrli jolmen - sýmen aralastyrý arqyly nemese qurǵaq kúıinde tutynýǵa bolady. Degenmen esh qosyndysyz paıdalanǵan anaǵurlym paıdaly. Sebebi sýblımatsııalyq ádispen alynatyn ónimniń quramynda dárýmenderdiń 95 paıyzy saqtalyp qalady. 2017 jyldyń jeltoqsan aıynan bastap búginge deıin oblys ortalyǵyna jáne Astana, Almaty óńirlerine 600 kelige jýyq ónim jiberilgen.
- Bul naǵyz taza tabıǵı sımbıotık. Aǵzadaǵy jasýshylardy qalypqa keltiredi jáne ımmýnıtetti nyǵaıtady. Qymyzdyń mundaı túrin zerttegen reseılik ǵalymdar ony balalardyń tamaǵyna qosýdy josparlap otyr. Tipti, áıel adamdarǵa júktilik kezinde paıdalanǵan óte paıdaly.
Aıta keterlik jaıt, bizdiń ónimdi ekiqabat kezinde tutynǵan tanys áıel adam dúnıege deni saý sábı ákelgen. Bala sary aýrý sııaqty eshbir aýrýǵa shaldyqpaǵan, - deıdi qojalyq ıesi. Sátbek Mýkın bıyl 400 bas iri qaraǵa eki baza men maldy azyqtandyrýǵa arnalǵan arnaıy baza salýdy kózdep otyr. Maqsatyn júzege asyrý úshin «Agrarlyq nesıe korporatsııasy» AQ nesıe alýǵa ótinish joldaǵan. Kásipker respýblıka boıynsha óz ónimin tasymaldaıtyn seriktesi «Fresh Milk» kompanııasyn sútpen qamtamasyz etedi. Qazir qys mezgilinde saýylatyn bıe sany az, degenmen táýligine 15-20 lıtr qymyzdyń qurǵaq túri óndiriledi. Bolashaqta saýylatyn bıe sanyn 120-ǵa deıin jetkizý josparda bar.
