Pavlodarda bes mıllıon teńge alıment tólemeı kelgen er adam ustaldy

PAVLODAR. KAZINFORM — Ol 2015 jyldan beri balalarymen kezdesýden qashqaqtap, alıment tólemeı kelgen. Qazir onyń máselesimen sot oryndaýshylary shuǵyldanyp jatyr.

Sharbaqty aýdanynyń polıtsııasyna er adamnyń burynǵy jubaıy habarlasyp, balalarynyń ákesi 9 jyldan beri eshbir tólem júrgizbeı otyrǵanyna shaǵymdanǵan. Belgili bolǵandaı, azamattyń burynǵy otbasy aldynda 5 mıllıon teńgege jýyq qaryzy bar.

«Sot sheshimine qaramastan, er adam 2015 jyldan bastap alıment tóleýden jasyrynyp, balalarymen kezdesýden qashqaqtap júrgen. Qaryz somasyn óndirip alý týraly sot sheshimin odan ári oryndaý úshin azamatty polıtsııa qyzmetkerleri ustap, jeke sot oryndaýshysyna berildi», -dep habarlady Pavlodar oblysy polıtsııa departamentinen.

Jyl basynan beri balalardy asyraýǵa qarajat tóleý boıynsha mindetterdi oryndamaýdyń 30 faktisi tirkeldi. Polıtseıler zań buzǵandarǵa qatysty aıyppuldar nemese qamaýǵa alý eshbir nátıje bermese, qylmystyq jaýapkershilik týyndaıtynyn eskertedi. 

Eske sala keteıik, Pavlodarda balasyna alıment tólemeı kelgen áıel bas bostandyǵynan aırylýy múmkin ekeni týraly jazǵanbyz.