Pavlodarda bes qabatty úıdiń eki páteri órtendi
ASTANA. QazAqparat - Pavlodarda Lermontov kóshesi, №85 úıdiń besinshi qabatyndaǵy eki bólmeli páterden órt shyǵyp, qyzyl jalyn kelesi páterge kóshken, dep habarlaıdy pavlodarnews.kz
Oblystyq TJD memlekettik til jáne aqparat toby habarlaǵandaı, oqys oqıǵa keshe keshkisin bolǵan.
«Saǵat 19:43 mınýtta órt týraly habarlama kelip tústi. Eki bólmeli páterde jıhaz, aǵash buıymdar janyp ketti. 40 sharshy metrge jaıylǵan qyzyl jalyn kórshi páterge kóshken. Sonyń saldarynan ol jerde úı jıhazdary órtenip, ekinshi úıde órt alty metr aýmaqty qamtydy. Oqıǵa ornynda bes tehnıka men jeke quramnan 15 adam jumys istedi. 1977 jyly týǵan er azamat pen 1968 jylǵy áıel adam qutqaryldy. 20:13 mınýtta órt aýyzdyqtalyp, 20:55-te tolyǵymen joıyldy, - deıdi mamandar.
Mundaı jaǵdaıdyń oryn alýyna órt qaýipsizdigi erejelerin saqtamaý sebep boldy. Tótenshe jaǵdaı departamenti otpen abaı bolý kerektigin eskertedi.
