Pavlodarda benzın men dızeldi zańsyz satqan kásipker 6 jylǵa sottaldy

PAVLODAR. QazAqparat - Qarjylyq monıtorıng agenttigi Pavlodar oblysynda munaı ónimderin shyǵý zańdylyǵyn rastaıtyn qujatsyz tasymaldaý jáne satý faktisin anyqtady, dep habarlaıdy QazAqparat.

Tergeý barysynda 15 kóterme jetkizýshiden 610 mıllıon teńgeden astam somaǵa 3,5 myń tonna AI-92 markaly benzın satyp alý faktisi áshkere boldy.

Ol keıinnen belgisiz tulǵalarǵa «Ýngefýg» JShS-nan qujatsyz satylǵan.

Dál osy JShS jalpy somasy 550 mıllıon teńgeden astam jalpy kólemi 2,4 myń tonna dızel otynyn qujatsyz satqan.

Sot Shuǵataev J.S. 6 jylǵa, Ýngefýg S.G. 4 jyl 6 aıǵa, Shamıev E.H. 2 jyl 8 aıǵa bas bostandyǵynan aıyrýǵa, 3 kólik pen 3 jartylaı júk tirkemelerin tárkileýge úkim shyǵardy.

«Janar-jaǵarmaı materıaldaryn respýblıkadan tys jerlerge zańsyz satý nemese áketý faktileri týraly habardar bolsańyz nemese ýákiletti organdar men uıymdardyń qyzmettik ókilettigin teris paıdalaný faktilerine tap bolsańyz, QMA nemese aýmaqtyq departamentterge táýlik boıy qyzmet kórsetetin senim telefondaryna habarlaýyńyzdy suraımyz» dep eskertedi agenttik.