Pavlodarda belgisiz bireýler qos terektiń qabyǵyn sypyryp alǵan
ASTANA. QazAqparat - Pavlodardaǵy Stepan Razın kóshesi, 1 mekenjaıynda Ertis jaǵasyndaǵy sýdan qutqarý stansasynda belgisiz jandar eki terektiń qabyǵyn sypyryp alǵan, dep habarlaıdy.
- Oqıǵa ornyna qalalyq TÚKSh bóliminiń mamandary shyǵyp, bolǵan faktini tirkeýge aldy, - deıdi Pavlodar qalasy ákiminiń baspasóz hatshysy Saltanat Ákimbekova. - Mundaı quqyq buzýshylyqqa jol bergen tulǵalardy anyqtaý maqsatynda barlyq materıal polıtsııaǵa tapsyryldy. Jasyl jelekke zııan keltirgen buzaqylar 20 AEK kóleminde aıyppul tóleýi múmkin. Al, eger de bul áreketke zańdy tulǵa barǵan bolsa, 30-100 AEK kóleminde aıyppul salynady. Bul osymen Pavlodarda oryn alǵan alǵashqy oqıǵa emes. Buǵan deıin vandaldar aǵash kesýge ruqsaty bolmasyna qaramastan, dúkenge kireberis jolda ósip turǵan terektiń tamyryna beton quıyp tastaǵan. Nátıjesinde jeke kásipkerlik ıesine 30 AEK kóleminde aıyppul salyndy.
Aıta keterligi, Stepan Razın, 1 kóshesinde eshqandaı dámhana men dúken ornalaspaǵan. Baspasóz hatshysynyń aıtýynsha, buzaqylardyń bul qylyǵynan eki terek endi jazda kesiletin boldy.
