Pavlodarda Batyrhan Shúkenovtiń beınesi paıda boldy
PAVLODAR. KAZINFORM — Pavlodar qalasyndaǵy ǵımarattardyń biriniń qabyrǵasyna tanymal ánshi Batyrhan Shúkenovtiń beınesi salyndy. Mýraldyń avtory — jergilikti sýretshi Natalıa Koroleva.
Mýral avtory súıikti ánshisine degen qurmetin shyǵarmashylyǵy arqyly jetkizýdi uıǵarǵan. Aıtýynsha, mýraldyń keıipkerin tańdaý qıyn bolmaǵan. Batyrhan Shúkenovtiń shyǵarmashylyǵyn erekshe jaqsy kóretin ol usynys túskende birden jarqyn talanttyń beınesin salyp shyǵýǵa sheshim qabyldapty.
— Bastapqyda qala ortalyǵynda budan da úlken qabyrǵaǵa keskinin salǵym kelgen. Alaıda ǵımarat ıesimen kelisimge kele almadyq. Sodan keıin osy qabyrǵany tańdadym. Bul jer úıime jaqyn, ashyq keńistikte ornalasqan ári aýmaqtan adamdar kóp ótedi. Sondyqtan eńbegim kópshiliktiń nazarynan tys qalmaıdy dep oıladym, — deıdi Natalıa Koroleva.
Mýraldy salýǵa bir apta ýaqytyn jumsaǵan sýretshiniń sózinshe, jumystyń eń kúrdeli tusy ánshiniń janary men kúlkisin dál beıneleý bolǵan. Sýretshiniń otbasy da bul bastamany qoldap, anasyna kómekteskenderin aıtady. Osylaısha ánshiniń shyǵarmashylyǵymen jaqynyraq tanysqan.
Týyndy búginde qala turǵyndarynyń súıispenshiligin týdyryp otyr. Kópshilik mýraldyń janynda sýretke túsip, áleýmettik jelilerde bólisip jatyr.
Sýretshi aldaǵy ýaqytta shahardaǵy ǵımarattardyń qabyrǵalaryna ózge de tanymal tulǵalardyń beınesin salýdy josparlap otyr. Alaıda kúnniń sýytýyna baılanysty bul jumys kelesi jylǵa qalmaqshy.
Atap óterligi, «Ónerli shahar» jobasy aıasynda Pavlodar qalasynyń kóshelerinde 20 aýqymdy mýral salý josparlanǵan. Joba tarıhty, mádenıetti jáne ulttyq qundylyqtardy dáripteýge baǵyttalǵan.
Qala ákimi Hasar Habylbekovtiń málimetinshe, jobaǵa Qazaqstannyń ár óńirinen kelgen sýretshiler qatysyp jatyr. Olar shahardyń ár bóligindegi ǵımarattardyń qabyrǵalaryna tarıhı oqıǵalardy, ulttyq mádenıetti jáne elge tanymal tulǵalardy beıneleıtin týyndylar salýda.
Joba avtorlarynyń paıymynsha, mýraldar Pavlodardyń sáýlettik kelbetin jańartyp qana qoımaı, ashyq aspan astyndaǵy kórkem galereıaǵa aınalyp, qala turǵyndary men qonaqtaryna óńirdiń tarıhy men mádenıetin tanytýǵa múmkindik beredi.
Eske sala keteıik, buǵan deıin Astananyń ákimdigi sýretshilerdi, graffıtı sheberlerin jáne shyǵarmashylyqpen aınalysatyn barsha azamatty qala keńistigin jańartýǵa úles qosyp, jańa mýraldardyń avtory atanýǵa shaqyratynyn jazǵanbyz.
