Pavlodarda bilim salasynda qandaı mamandarǵa suranys bar
PAVLODAR. KAZINFORM — Pavlodar oblysynda matematıka páni jáne bastaýysh synyp muǵalimderine suranys baıqalady. Sondaı-aq qalalyq jerlerde tárbıeshiler jetispeıdi.
Óńirlik bilim berý basqarmasynyń dereginshe, aımaqtaǵy mektepterge matematıka pániniń bes jáne bastaýysh synyptyń úsh muǵalimi jetispeı jatyr.
— Atalǵan pánder boıynsha pedagogterge qajettiliktiń negizgi sebepteri — pedagogterdiń zeınetke shyǵýy, ózge jumys oryndaryna aýysýy, sondaı-aq eńbek jáne dekrettik demalysqa shyǵýyna baılanysty ýaqytsha bos oryndardyń paıda bolýy. Jekelegen pánder boıynsha kadr tapshylyǵynyń bolýyna qaramastan, Pavlodar oblysynyń bilim berý uıymdarynda oqý protsesi tolyq kólemde júzege asyrylady. Úlgilik oqý josparynda kózdelgen barlyq oqý páni júrgizilip, memlekettik jalpyǵa mindetti bilim berý standarty saqtalady, — dep habarlady Kazinform tilshisine bilim berý basqarmasy basshysynyń orynbasary Nurgúl Azanbaeva.
Buǵan qosa, qazirgi ýaqytta qalalyq jerlerdegi balabaqshalarda tárbıeshiler men olardyń kómekshileriniń jetispeýshiligi baıqalady. Pavlodar jáne Ekibastuz qalalary boıynsha jeti tárbıeshiniń orny bos tur. Aqsý qalasy boıynsha eki tárbıeshi kómekshisine, Ekibastuz qalasy boıynsha bes tárbıeshi kómekshisine suranys bar.
Bıyl oblystyń bilim berý salasyna 591 jas maman kelgen. Olardyń 209-y aýyldyq jerlerdi tańdady. Bul pedagog kadrlarǵa degen qajettilikti jabady dep úmit artylyp otyr.
Buǵan deıin aýyl mektebine basshy tabý nege qıyn ekenin saraptap kórgen edik.
