Pavlodarda basshysyz otyrǵan mektepterdiń kóbi aýyldarda ornalasqan

PAVLODAR. KAZINFORM — Qazir oblystaǵy bilim berý uıalarynyń 13%-da mektep dırektorlarynyń orny bos tur. Olardyń basym bóligi aýyldyq jáne shalǵaı eldi mekenderge tıesili.

Óńirlik bilim berý basqarmasynyń deregine súıensek, jergilikti orta bilim berý uıymdarynyń 5%-yn (18 basshy) zeınet jasyndaǵy dırektorlar basqaryp otyr. Al mektepter boıynsha 45 dırektordyń orny bos tur (barlyq mekteptiń 13%-y).

— Bos oryndardyń basym bóligi aýyldyq jáne shalǵaı eldi mekenderge tıesili. Bul jerlerde úmitkerler arasyndaǵy básekelestik deńgeıi tómen jáne bilikti kadrlardyń sany shekteýli. Mundaı jaǵdaı basshylardy ýaqtyly taǵaıyndaýdy qıyndatady jáne mamandardy irikteý men ornyqtyrý úshin qosymsha sharalardy qajet etedi, — dep habarlady bilim berý basqarmasynan.

Qazir dırektorlardy taǵaıyndaýǵa konkýrs ótkizý jumystary júrgizilip jatyr.

Budan bólek, bıyl 13 rezervıst oqytýdan ótip jatyr. Kadrlyq rezervtiń qorytyndy kezeńi aıaqtalǵan soń olardy oblys bilim berý uıymdaryna taǵaıyndaý josparlanǵan. Al oblystyq kadrlyq rezervte 46 rezervıst bilim alýda.

— Óńirde kadrlyq rezervti jańartý jáne súıemeldeý boıynsha keshendi jumystar júrgizilip keledi. Bul jumystardyń aıasynda oqytý semınarlary, keńes berý, tálimgerlik baǵdarlamalar jáne basqarýshylyq quzyretterdi baǵalaý sharalary uıymdastyrylyp jatyr. Atalǵan sharalar bilim berý júıesiniń turaqtylyǵyn qamtamasyz etýge, tıimdi basqarýshy korpýs qalyptastyrýǵa jáne Pavlodar oblysyndaǵy oqý úderisiniń sapasyn arttyrýǵa baǵyttalǵan, — dep qosty basqarmadan.

Eske sala keteıik, buǵan deıin Oqý-aǵartý mınıstri mktep dırektorlarynyń jetispeýshiligi úsh ese qysqarǵany týraly aıtqan.