Pavlodarda barǵa kelýshiler 5 saǵat boıy polıtsııadan jasyrynyp otyrǵan
PAVLODAR. QazAqparat – Pavlodarda karaoke barǵa kelýshiler bes saǵat boıy polıtsııadan jasyrynyp, shyqpaı otyrǵan, dep habarlaıdy QazAqparat Ravlodarnews.kz saıtyna silteme jasap.
Atalǵan fakti boıynsha mekeme ıesin jaýapkershilikke tartý úshin materıal taýarlar men qyzmetterdiń qaýipsizdigi sapasyn baqylaý basqarmasyna jiberildi.
- Demalys kúni saǵat 22.30-da polıtsııaǵa Astana kóshesi, 16/2 boıynsha karaoke bardyń jumys istep turǵany týraly aqparat kelip tústi. Mekemeniń ishindegiler qulyptap jaýyp alyp, tártip saqshylaryna esikti ashpaı qoıǵan. Bardyń janynda polıtseıler kelýshilerdiń shyǵýyn 5 saǵat kútýge májbúr boldy, al ákimshilik tańǵy 3.30-da ǵana mekemeni ashty, - deıdi oblystyq PD baspasóz qyzmetinde.
Jeke tulǵalardy tekserý jáne anyqtaý úshin polıtsııa bólimine 28 kelýshi men 7 bar qyzmetkeri jetkizildi.
- Demalys kúni 8 buzýshylyq anyqtaldy. Saǵat 21.40-ta Malaısary batyr kóshesindegi qalanyń laýndj-barlarynyń biri jumys istegen. Munda kelýshiler kalıan shegip, 30-dan astam adamnyń qatysýymen bı keshin ótkizgen. Kalıan shekken klıentterge qatysty QR ÁQBK 441-baby boıynsha ákimshilik is qozǵaldy. Mekeme ákimshisi kalıan tutynýǵa jol bergeni úshin QR ÁQBK 441-baby boıynsha jaýapkershilikke tartyldy. Sondaı-aq oǵan qatysty QR ÁQBtK-niń 425-baby boıynsha materıaldar jınaqtalyp, taýarlar men qyzmetterdiń sapasy men qaýipsizdigin baqylaý basqarmasyna joldandy, - deıdi departamentte.
Tártip saqshylary azamattarǵa monıtorıng toptarymen karantın rejımin buzýshylyqtardy anyqtaý boıynsha jumys jalǵasyp jatqanyn eske salady. Sondaı-aq, barlyq sanıtarlyq normalardy saqtaýǵa keńes beredi.
