Pavlodarda balyqtardyń qyrylýyna baılanysty komıssııa quryldy
«Zaısan-Ertis» oblysaralyq basseındik balyq sharýashylyǵy ınspektsııasynyń málimetinshe, 2022 jylǵy 14 sáýir kúni saǵat 16:00-de Pavlodar oblystyq balyq ınspektsııasy bólimine Aqsý qalasynyń Lenınskıı kentiniń mańyndaǵy Tıapka kólinde balyqtardyń qyrylǵany týraly beıne habarlama kelip tústi. Bekitilgen ózara is-qımyl syzbasyna sáıkes, janýarlardyń qyrylý qaýpi jáne ólimi anyqtalǵan kezde memlekettik organdarǵa (Pavlodar oblysy boıynsha ekologııa departamenti, Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasy, «BSh ǴÓO» JShS Altaı fılıaly) habarlanady», - delingen QR EGTRM Balyq sharýashylyǵy komıtetiniń Facebook paraqshasynda jarııalanǵan aqparatta.
Komıtettiń habarlaýynsha, balyqtyń qyrylý sebepterin, sandyq jáne túrlik quramyn anyqtaý maqsatynda búgin komıssııanyń balyq qyrylǵan jerge barýy josparlanǵan. Balyqtardyń qyrylý sebebi týraly aqparat zerthanalyq zertteýler nátıjelerin alǵannan keıin qosymsha habarlanady.
